ലാലേട്ടന്റെ സ്പെഷൽ ചിക്കൻ കറിയുമായി ജോമോൾ - വിഡിയോ

ജോമോളെന്നു വിളിക്കുന്ന ജോവിതക്കുട്ടിയ്ക്ക് കാർട്ടൂണിനേയും കളിപ്പാട്ടങ്ങളേയുംകാൾ ഇഷ്ടം പാചകത്തിലാണ്. അടുക്കളയിലിരിക്കാനാണത്രേ കക്ഷിക്ക് കൂ‌ടുതലിഷ്ടം. അങ്ങനെ തനിയെ ഓരോന്ന് ഉണ്ടാക്കാൻ തുടങ്ങിയപ്പോൾ അച്ഛനുമ്മയും അത് വിഡിയോ ചെയ്തു തുടങ്ങി. പിന്നെ മിക്കി ഗേൾസ് ആന്റ് ഡാഡി എന്നൊരു യൂ ട്യൂബ് ചാനലും കുഞ്ഞു ജോമോള്‍ക്കായി തുടങ്ങുകയായിരുന്നു. ഇതുവരെ ചൈനീസ് ഫിലിപ്പീൻസ് തു‌ടങ്ങി നിരവധി റെസിപ്പികളടങ്ങിയ വിഡിയോകൾ ചെയ്തു കഴിഞ്ഞു. ജോമോളുടെ രസകരമായ സംസാരമാണ് വിഡിയോകളുടെ ഹൈലൈറ്റ്.

ഇപ്പോഴിതാ മോഹൻലാൽ കഴിഞ്ഞ ദിവസം പങ്കുവച്ച സ്പെഷൽ ചിക്കൻ കറിയുമായി എത്തിയിരിക്കുകയാണ് ജോമോള്‍. ലാലേട്ടന്റെ കടുത്ത ആരാധികയായ ഈ കുഞ്ഞുമിടുക്കി വൈറലായ ആ ചിക്കൻ കറിയുടെ റെസിപ്പിയും വിഡിയോയുമാണ് പങ്കുവച്ചിരിക്കുന്നത്. പാചകത്തിനിടയിൽ ജോമോൾക്ക് ചില സംശയങ്ങൾ, പിന്നെ ഒട്ടും മടിച്ചില്ല ഫോണെടുത്ത് ലാലേട്ടനെ സാങ്കൽപ്പികമായി വിളിച്ച് ആ സംശയമങ്ങു തീർത്തു. ലാലേട്ടൻ സ്പെഷൽ ചിക്കൻക്കറിയുണ്ടാക്കി അനിയത്തിയ്​ക്കൊപ്പമിരുന്നു കഴിക്കുകയാണ് ജോമോൾ. 

മുൻപൊരിക്കൽ ചൈനീസ് കഞ്ഞിയുണ്ടാക്കുന്ന വിഡിയോയുമായെത്തി ശ്രദ്ധേ നേടിയിരുന്നു ജോമോൾ. കഴിഞ്ഞ കർക്കിടക മാസത്തിലാണ് വെറൈറ്റി കഞ്ഞിയുമായി ഈ മിടുക്കി എത്തിയത്. ബ്രൂണൈയിൽ ദാരുസലാം ഓയിൽ ആന്‍റ് ഫീൽഡിൽ ഉദ്യോഗസ്ഥനായ ജോയിത് ജതിന്റേയും സംഗീത സുഗതന്റേയും മകളാണ് ജോവിത. രണ്ടര വയസുകാരി ജോഗിതയാണ് അനിയത്തി.

English Summary : Jovitha cooking videos Mickey girls and the daddy –Cooking Mohanlal special chicken curry