മൂന്ന് വയസ്സുകാരൻ ‘എക്സ്കവേറ്റർ' ഓപ്പറേറ്റർ; പഠിച്ചെടുത്തത് ഒറ്റ ആഴ്ചകൊണ്ട്
Mail This Article
വളരെ അനായാസം "എക്സ്കവേറ്റർ" പ്രവർത്തിപ്പിക്കുന്ന ഒരു മൂന്ന് വയസ്സുകാന്റെ വിഡിയോ വൈറലാകുകയാണ്. ചൈനയിലെ സെജിയാങ് പ്രവിശ്യയിലെ യുയു എന്ന മൂന്ന് വയസ്സുകാരനാണ് എക്സ്കവേറ്റർ പ്രർത്തിപ്പിച്ച് ശ്രദ്ധനേടുന്നത്. വഴിയിൽ എവിടെ എക്സ്കവേറ്റർ കണ്ടാലും യുയൂ അതിൽ തന്നെ നോക്കിനിൽപ്പാണ്. എക്സ്കവേറ്ററിനോടുള്ള മകന്റെ താൽപ്പര്യം കണ്ട് അവന്റെ അച്ഛൻ സെങ്ങാണ് എക്സ്കവേറ്റരിന്റെ ഒരു മിനിയേച്ചർ ഉണ്ടാക്കി നൽകിയത്.
സംഭവം കൈയ്യിൽ കിട്ടിയതും ഇതിന്റെ പ്രവർത്തന രീതികളൊക്കെ കക്ഷി ടപ്പേന്നങ്ങ് പഠിച്ചെടുത്തു. യുയു ഈ ചെറിയ പ്രായത്തില് തന്നെ ‘എക്സ്കവേറ്റർ' പ്രവർത്തിപ്പിക്കുന്നതിൽ തന്റെ പ്രാഗൽഭ്യം തെളിയിച്ചിരിക്കുകയാണ്. വെറും ഒരാഴ്ചകൊണ്ടാണ് യുയു ഇത് പഠിച്ചെടുത്തത്. സൗത്ത് ചൈന മോണിങ് പോസ്റ്റാണ് യുയുവിന്റെ വിശേഷം പങ്കുവച്ചത്.
താൻ ഇതിന്റെ പ്രവർത്തന രീതികൾ പഠിക്കാൻ ഒരു മാസമെടുത്തപ്പോൾ യുയു ഒരാഴ്ചകൊണ്ട് അത് പഠിച്ചെടുത്തുവെന്ന് സെങ് പറയുന്നു. ഈ എക്സ്കവേറ്ററുമായി മകനെ കൃഷിയിടത്തിലും ബീച്ചിലുമെല്ലാം സെങ് കൊണ്ടു പോകും. മകൻ എക്സ്കവേറ്റർ ഫ്രവർത്തിപ്പിക്കുന്ന നിരവധി വിഡിയോകൾ ഈ അചഛൻ പോസ്റ്റ് ചെയ്യാറുമുണ്ട്. അപകട സാധ്യതയുള്ളതിനാൽ മാതാപിതാക്കളുടെ സാന്നിധ്യത്തിൽ മാത്രമേ ഈ എക്സ്കവേറ്റർ പ്രവർത്തിപ്പിക്കാൻ യുയുവിനെ അനുവദിക്കാറുള്ളൂ.
English Summary : Three year old Chinese kid who operators excavator