ട്രെയിന്‍ യാത്രക്കിടെ അച്ഛന് ഭക്ഷണം വാരികൊടുത്ത് കുഞ്ഞ്: ഹൃദയം നിറയ്ക്കും വിഡിയോ

മുംബൈ ലോക്കൽ ട്രെയിനിൽ അച്ഛന് ഭക്ഷണം വാരിക്കൊടുക്കുന്ന ഒരു കുഞ്ഞിന്റെ വിഡിയോ സമൂഹമാധ്യമങ്ങളിൽ ശ്രദ്ധനേടുകയാണ്.  അച്ഛനും കുഞ്ഞുമകളും തമ്മിലുള്ള ഈ മനോഹരമായ നിമിഷങ്ങളുടെ ദൃശ്യങ്ങൾ ആരുടേയും കണ്ണുകളെ ഈറനണിയിക്കും. മുംബൈയിലെ ഒരു ലോക്കൽ ട്രെയിനിനുള്ളിൽ നിന്ന് ചിത്രീകരിച്ച ഈ വിഡിയോ സാക്ഷി മെഹ്‌റോത്രയാണ് ഇൻസ്റ്റഗ്രാമിൽ പോസ്റ്റ് ചെയ്തത്. നിമിഷ നേരം കൊണ്ടാണ് ഈ കുഞ്ഞ് വിഡിയോ വൈറലായത്. 

ട്രെയിനിനുള്ളിൽ നിലത്തിരിക്കുന്ന അച്ഛനരികെ നിൽക്കുകയാണ് കുഞ്ഞാവ. താൻ കഴിക്കുന്നതിനൊപ്പം ആ കുഞ്ഞിക്കയ്യാൽ പിതാവിനും ഭക്ഷണം വായിൽ വച്ച് കൊടുക്കുകയാണ്. അപ്പോൾ അച്ഛൻ മകളെ സ്നേഹത്തോടെ ചേർത്തുപിടിച്ച് തഴുകുകയാണ് വിഡിയോയിൽ. ഏകദേശം ഒരുവയസ് മാത്രം പ്രായം തോന്നിക്കുന്ന  ഈ കുരുന്നിന്റെ വിഡിയോ സമൂഹമാധ്യമങ്ങളും ഏറ്റെടുത്തു. ഏതാനും ആഴ്ചകൾക്ക് മുമ്പ് ഇൻസ്റ്റാഗ്രാമിൽ പങ്കിട്ട ഈ വിഡിയോ 6.8 ലക്ഷത്തിലധികം ആളുകളാണ് കണ്ടുകഴിഞ്ഞത്.

English Summary : Viral video- Little girl feeds father in Mumbai local train