നമുക്ക് ‘നമ്മളെക്കാൾ കുറച്ചുകൂടി മിടുക്കരായ’ നമ്മളെ ഉണ്ടാക്കാനാകുമോ?

ഇതെന്തു ചോദ്യം ആണല്ലേ? കുറച്ചുകൂടി സൗന്ദര്യമുള്ള, ആരോഗ്യമുള്ള, ബുദ്ധിയുള്ള രീതിയിൽ നമ്മെത്തന്നെ മാറ്റിയെടുക്കാൻ കഴിയുമോ എന്നതാണ് ചോദ്യം. 'തീർച്ചയായും കഴിയും' എന്നാണ് ബയോടെക്‌നോളജിയിലെ ‘ജനിതക എൻജിനീയറിങ്’ (Genetic Engineering) ഗവേഷണങ്ങൾ ഉറപ്പ് നൽകുന്നത്. അതിനെയാണ് നമ്മൾ 'ജനിതകമാറ്റം വരുത്തിയ ജീവികൾ' (Genetically Modified Organisms) എന്ന് പറയുന്നത്. അതായത്, ജനിതക എൻജിനീയറിങ് സാങ്കേതികതയിലൂടെ ജനിതകഘടനയിൽ മാറ്റം വരുത്തിയ ജീവികളാണ് ചുരുക്കപ്പേരിൽ ജിഎംഒ എന്ന് അറിയപ്പെടുന്നത്. അത് മനുഷ്യൻ മാത്രമല്ല, സസ്യമാകാം, മൃഗമാകാം, അല്ലെങ്കിൽ സൂക്ഷ്മജീവികളുമാകാം.

മരുന്നുകൾ, ജനിതകമാറ്റം വരുത്തിയ ഭക്ഷണങ്ങൾ, വിളകൾ, ജീവികൾ എന്നിങ്ങനെ വിവിധ മേഖലകളിൽ ജനിതകമാറ്റം നടത്തി ശാസ്ത്രലോകം വിജയിച്ചിട്ടുണ്ട്. അതിൽ ചിലത് നമുക്ക് നോക്കാം.

സുവർണ്ണ അരി (Golden Rice) : 1990കളിൽ ഏംഗോ പോട്ടറിക്കസ്, പീറ്റർ ബെയർ (Ingo Potrykus and Peter Beyer) എന്നീ ശാസ്ത്രജ്ഞരാണ് സാധാരണ അരിയിൽ നിന്ന് സുവർണ്ണ അരി എന്ന ജനിതകമാറ്റം വരുത്തിയ അരി ഉണ്ടാക്കിയെടുത്തത്. ഡാഫൊഡിൽ ചെടിയിൽ നിന്ന് എടുക്കുന്ന ഡാഫോഡിൽ (Daffodil) ജീനും മണ്ണിൽ ഉള്ള Erwinia uredovora എന്ന ബാക്ടീരിയയിൽ നിന്ന് എടുക്കുന്ന ജീനും അരിയിൽ സംയോജിപ്പിച്ചാണ് ബീറ്റ-കരോട്ടിൻ ഉൽപാദിപ്പിക്കുവാൻ കഴിയുന്ന അരി വികസിപ്പിച്ചെടുത്തത്. ഇത്തരത്തിൽ ഭക്ഷ്യവിളകളിലെ പോഷകമൂല്യം ത്വരിതപ്പെടുത്തുന്ന പ്രക്രിയയ്ക്ക് ബയോഫോർട്ടിഫിക്കേഷൻ (Biofortification) എന്നാണ് പറയുന്നത്. മേൽസൂചിപ്പിച്ച ജീനുകളുടെ സഹായത്തോടെ ബീറ്റ–കരോട്ടിൻ ഉൽപാദിപ്പിക്കപ്പെടുകയും അവ നാം ഭക്ഷിക്കുമ്പോൾ വിറ്റാമിൻ-എ ആയി മാറുകയുമാണ് ചെയ്യുന്നത്. ഇത്തരത്തിൽ ജനിതകമാറ്റം വരുത്തിയ GM അരി കഴിക്കുന്നതിലൂടെ വിറ്റാമിന്റെ കുറവ് പരിഹരിക്കാൻ  കഴിയും.

ഫ്ലാവർ സേവർ തക്കാളി (Flavr savr Tomato):  ജനിതക എൻജിനീയറിങ്ങിലൂടെ ഉണ്ടാക്കിയെടുത്ത ലോകത്തെ ആദ്യത്തെ സമ്പൂർണ ഭക്ഷ്യവിളയാണ് ഫ്ലാവർ സേവർ തക്കാളി (1994). മനുഷ്യന് ഭക്ഷിക്കുവാൻ കഴിയുന്ന ലൈസൻസ് നേടിയ ആദ്യത്തെ ജനിതകമാറ്റം വരുത്തിയ വിളയും ഇതാണ്. തക്കാളിയിൽ  'ആന്റിസെൻസ് ജീൻ' (Antisense Gene) ചേർത്തുകൊണ്ട് അത് പഴുക്കുവാനെടുക്കുന്ന ദിനങ്ങളുടെ ദൈർഘ്യം കുറയ്ക്കുകയാണ് ഇവിടെ ചെയ്യുന്നത്. തക്കാളിയുടെ കോശഭിത്തിയിൽ ഉള്ള 'പെക്ടിൻ' (Pectin) അലിയിച്ചുകൊണ്ട് അവയെ കൂടുതൽ മൃദുവാക്കുന്നത് 'പോളിഗാലക്ടോറുണെസ്' (Polygalacturonase) എന്ന എൻസൈം ആണ്. ഇതിന്റെ ഫലമായി കൂടുതൽ മൃദുവാകുന്ന തക്കാളിയെ ഫംഗസുകൾ ആക്രമിക്കുകയും, പെട്ടെന്ന് അവ ചീഞ്ഞുപോകുകയും ചെയ്യുന്നു. എന്നാൽ ഈ ആന്റിസെൻസ് ജീനുകൾ 'പോളിഗാലക്ടോറുണെസ്' ഉൽപാദനത്തെ തടയുകയും, അതുമൂലം മൃദുവാകാത്ത തക്കാളി കൂടുതൽ കാലം ചീത്തയാവാതെ ഇരിക്കുകയും ചെയ്യുന്നു. വളരെ വിജയകരമായ ഒരു നേട്ടമായിരുന്നു ഇതെങ്കിലും പ്രതീക്ഷിക്കാതെ ചില ആരോഗ്യപ്രശ്നങ്ങൾ ഇതിന്റെ ഫലമായി ഉടലെടുത്തതിനാൽ ഇവ പിന്നീട് പിൻവലിക്കേണ്ടതായി വന്നു.

ബിടി ചോളം (Bt Maize) : 'ബാസില്ലസ് തുറിഞ്ചിയൻസിസ്‌' (Bacillus thuringiensis) എന്ന ഒരുതരം ബാക്ടീരിയയെ ചേർത്തുകൊണ്ടാണ് ചോളത്തിന്റെ ഈ വെറൈറ്റി ഉണ്ടാക്കുന്നത്. ചോളത്തിനെ ആക്രമിക്കുന്ന ഈ കീടങ്ങളെ നശിപ്പിക്കുന്നതിനുള്ള 'ഡെൽറ്റ പ്രോട്ടീൻ' ഉൽപാദിപ്പിച്ചുകൊണ്ടാണ് ബിടി ചോളം പ്രവർത്തിക്കുന്നത്. ചോളം ഭക്ഷിക്കുന്ന കീടങ്ങളുടെ വയറ്റിൽ ഡെൽറ്റ പ്രോട്ടീൻ എത്തുകയും അവിടെ പ്രവർത്തിച്ചുകൊണ്ട് കീടത്തിന്റെ വയറിന്റെ ആന്തരികപാളി നശിപ്പിക്കുകയും, പിന്നെ ഭക്ഷണം കഴിക്കാനാകാതെ ചാകുകയും ചെയ്യുന്നു. ഏറ്റവും ക്രിയാത്മകമായ ജനിതക കീടനാശിനിയായാണ് ഇതിനെ വിലയിരുത്തുന്നത്. 

GM ഉരുളക്കിഴങ്ങ് (Genetically Modified Potato): ആർഎൻഎ ഇന്റർഫെറൻസ് (RNA Interference) എന്ന പ്രക്രിയ ഉപയോഗിച്ച് ആണ് ഉരുളക്കിഴങ്ങുകളിൽ ജനിതകമാറ്റം സാധ്യമാക്കുന്നത്. ബ്ലാക്ക് സ്പോട്ട്, ബ്രൗണിങ് തുടങ്ങിയ രോഗങ്ങൾ ഉണ്ടാക്കുന്ന ജീനുകളെ ഈ പ്രക്രിയവഴി 'സ്വിച്ച് ഓഫ്' ചെയ്യുന്നു. അങ്ങനെ 'അസ്പരാജിൻ' (Asparagine) എന്ന അമിനോ ആസിഡുകൾ ഉൽപാദിപ്പിക്കും. അവ പിന്നീട് കിഴങ്ങുകൾ പാകം ചെയ്യുമ്പോൾ നമുക്ക് ഉപയോഗപ്രദമായ 'അക്രയിൽ അമൈഡ്' ആയി മാറും. കൂടാതെ കീടങ്ങളെ പ്രതിരോധിക്കുന്ന പരുത്തിയായ ബിടി പരുത്തി (Bt Cotton). പാലിൽ മനുഷ്യ പ്രോട്ടീനുകൾ ഉൽപാദിപ്പിക്കാൻ കഴിയുന്ന ട്രാൻസ്‌ജെനിക് പശു (Transgenic Cow). സൊമാറ്റിക് കോശങ്ങളിൽ നിന്ന് വികസിപ്പിച്ചെടുത്ത ആദ്യത്തെ ട്രാൻസ്‌ജെനിക് ചെമ്മരിയാട് ഡോളി, എന്നിവയൊക്കെ ജനിതക വ്യതിയാനം വരുത്തിയ വിളകൾക്കും മൃഗങ്ങൾക്കും ഉദാഹരണങ്ങളാണ്.

പരിമിതികളും, പോരായ്മകളും

കാര്യങ്ങൾ ഇങ്ങനെയൊക്കെയാണെങ്കിലും ജനിതകമാറ്റം വരുത്തിയ വിളകൾ പൂർണമായും വിജയകരമാണെന്ന് പറയാനാകില്ല. ലാബുകളിലെ പല പരീക്ഷണങ്ങളിലും ജിഎം വിളകൾ നൽകിയ ജീവികളിൽ കരൾ പ്രശ്നങ്ങൾ കണ്ടെത്തിയിട്ടുണ്ട്. മാത്രമല്ല, ഇത്തരം വിളകൾ ജീവികളിൽ കൂടുതലായി അലർജി ഉണ്ടാകുന്നതായും പഠനങ്ങൾ ഉണ്ട്. ചില ആന്റിബയോട്ടിക്കുകളോട് വളരെ പെട്ടെന്ന് പ്രതിരോധശക്തി നേടുന്നതും അതിന്റെയൊരു പരിമിതിയാണ്. കൂടാതെ വിഷ പദാർഥങ്ങൾ ഉൽപാദിപ്പിക്കുന്ന ബാക്ടീരിയകൾ വീണ്ടും മണ്ണിൽ എത്തുമ്പോൾ അത് അവിടെ പ്രവർത്തിക്കുകയും മണ്ണിലുള്ള മറ്റ് ഗുണകരമായ ജീവികളെയും നശിപ്പിക്കുന്നതും ഇതിന്റെ പോരായ്മയാണ്.

Content summary : Genetic Engineering