സൂത്രവാക്യങ്ങൾ മാത്രം പഠിച്ചാൽ പോര, കോമ്പസിന്റെ സൂചിയും സ്‌ക്രൂവും പരിശോധിക്കണം

∙ പ്രധാനപ്പെട്ട 7 ആശയങ്ങളിൽ നിന്നാണു പരീക്ഷയ്ക്കു നിർമിതി ചോദ്യങ്ങൾ വരിക. മുൻകാല ചോദ്യപേപ്പറുകളിൽ നിന്നുള്ള പരിശീലന ചോദ്യങ്ങൾ കണ്ടെത്തി വരച്ചു പഠിക്കണം. നിർമിതികൾ ഭംഗിയായി വരയ്ക്കണം. വരയ്ക്കുന്നവയുടെ അളവുകൾ എഴുതാൻ മറക്കരുത്. ഇത്തരം ചോദ്യങ്ങളിൽ ഏതെങ്കിലും ഭാഗം അളന്ന് ഉത്തരമെഴുതാൻ പറയാറുണ്ട്.  

∙ സ്‌കെയിലിന്റെ വക്കുകള്‍, കോമ്പസിന്റെ സൂചിയും സ്‌ക്രൂവും എന്നിവ പരിശോധിച്ച് കൃത്യത ഉറപ്പുവരുത്തണം. കോംപസില്‍ പെൻസിൽ നേരത്തേ ഉറപ്പിച്ചു വയ്ക്കണം. പെന്‍സിലിന് കോംപസിനേക്കാള്‍ ഉയരം കുറവായിരിക്കണം.

∙ സൂത്രവാക്യങ്ങൾ, നിർവചനങ്ങൾ, ത്രികോണമിതി വിലകൾ എന്നിവ പഠനമുറിയിൽ എഴുതി ഒട്ടിച്ചുവയ്ക്കണം. പലവട്ടം ഇവ വായിച്ചു നോക്കണം. മധ്യമം കണ്ടെത്താനുള്ളതു പോലെ ഉറപ്പു ചോദ്യങ്ങൾ കണ്ടെത്തി അവ പരിശീലിക്കണം.

∙ 1 മുതൽ 35 വരെയുള്ള സംഖ്യകളുടെ വർഗങ്ങൾ പഠിച്ചുവയ്ക്കുന്നത് ഉപകാരപ്രദമാകും. സംഖ്യകളുടെ ഗുണനവും ഹരണവും, വർഗമൂലം കാണുക, ദശാംശസംഖ്യകളുടെയും ഭിന്നസംഖ്യകളുടെയും ക്രിയകൾ എന്നിവ ദിവസേന ചെയ്തു ശീലിക്കണം.

∙ പ്രധാന ആശയങ്ങൾ ഒരു നോട്ടുബുക്കിൽ ചെറിയ കുറിപ്പുകളായി എഴുതിവയ്ക്കണം. ഇടയ്ക്കിടെ അതു വായിച്ചു നോക്കണം. പരീക്ഷാ ഹാളിൽ പ്രവേശിക്കുന്നതിനു തൊട്ടു മുൻപു പോലും അവ വായിച്ചുനോക്കിയാൽ ഒരു റിവിഷന്റെ ഫലം ചെയ്യും.

∙ ശരാശരി 29 ചോദ്യങ്ങളാണ് പരീക്ഷയ്ക്ക് ഉണ്ടാവുക. 2,3,4,5 മാർക്കുകളുടെ വിഭാഗത്തിൽ യഥാക്രമം 3,4,8,6 എണ്ണം ചോദ്യങ്ങൾക്കാണ് ഉത്തരം എഴുതേണ്ടത്.

∙ 2 മാർക്കിന്റെയും 3 മാർക്കിന്റെയും ആദ്യ 2 വിഭാഗങ്ങളിലെ ചോദ്യങ്ങൾക്ക് ഉത്തരമെഴുതാൻ ആദ്യ അരമണിക്കൂർ, തൊട്ടടുത്ത 4 മാർക്കിന്റെ വിഭാഗത്തിലെ 8 ചോദ്യങ്ങൾക്കും 5 മാർക്കിന്റെ 6 ചോദ്യങ്ങൾക്കും ഉത്തരമെഴുതാൻ 50 മിനിറ്റും മാറ്റിവച്ചാൽ ബാക്കി 20 മിനിറ്റ് എക്‌സ്ട്രാ ചോദ്യങ്ങൾക്ക് ഉത്തരമെഴുതാനും വായിച്ചു നോക്കാനുമൊക്കെ ലഭിക്കും. ഈ സമയക്രമം ഒരു സൂചനയായി പറയുന്നു എന്നേയുള്ളൂ. ഓരോരുത്തരും തങ്ങളുടെ ശേഷി അനുസരിച്ച് ഇത്തരമൊരു പ്ലാൻ സ്വന്തമായി തയാറാക്കണം.

∙ പരീക്ഷയിൽ പറഞ്ഞിരിക്കുന്ന എണ്ണമനുസരിച്ച് ഓരോ വിഭാഗത്തിലും ഉത്തരങ്ങൾ എഴുതിക്കഴിഞ്ഞുവെന്നിരിക്കട്ടെ. ബാക്കി സമയം കൂടുതൽ ചോദ്യങ്ങൾ ഓരോ വിഭാഗത്തിൽ നിന്നും എഴുതാൻ ശ്രമിക്കുന്നത് ഗുണകരമാകും. ഏതെങ്കിലും ഒരു ഉത്തരം തെറ്റിയാലും അധികമായി എഴുതിയവയുടെ മാർക്ക് അത് പരിഹരിക്കുമല്ലോ.

∙ നന്നായി അറിയാവുന്നവ, കുറച്ചൊക്കെ അറിയാവുന്നവ, നന്നായി ആലോചിച്ചാൽ കിട്ടുമെന്നുള്ളവ എന്നിങ്ങനെ ചോദ്യനമ്പറിനു നേരെ വ്യത്യസ്ത അടയാളങ്ങളിട്ട് തിരിച്ചാൽ കുറച്ചുകൂടി ആസൂത്രണത്തോടെ എഴുതാൻ പറ്റും.

∙ ഓരോ ചോദ്യത്തിന്റെയും ഉത്തരം എഴുതിക്കഴിഞ്ഞ ശേഷം നമ്പറുകൾക്ക് നേരെ ടിക് ഇടുന്നത്, എത്ര ചോദ്യങ്ങൾക്ക് ഉത്തരമെഴുതി എന്ന് ഉറപ്പിക്കാൻ സഹായിക്കും.

∙ ചോദ്യങ്ങളുടെ ഉപചോദ്യങ്ങൾക്കെല്ലാം ഉത്തരം എഴുതിയെന്ന് ഉറപ്പാക്കണം. ഉപചോദ്യങ്ങൾ വിട്ടുപോകുന്നത് പൊതുവെ സംഭവിക്കാവുന്ന പിഴവുകളിലൊന്നാണ്.

∙ പഠിച്ചാൽ മറന്നുപോകുമെന്ന് തോന്നുന്നവ പ്രത്യേകം നോക്കിവച്ച്, ഹാളിൽ കയറുന്നതിന് തൊട്ടുമുൻപ് അവ ഒന്നു കൂടി നോക്കിയ ശേഷം അത്തരം ചോദ്യങ്ങൾ വന്നിട്ടുണ്ടെങ്കിൽ അവയ്ക്ക് ഉത്തരം ആദ്യമെഴുതുന്നത് നന്നായിരിക്കും.