നിർബന്ധിച്ചും പേടിപ്പിച്ചും ചെയ്യിക്കേണ്ടതല്ല ഇക്കാര്യങ്ങൾ; മക്കളെ സമ്മർദത്തിലേക്ക് തള്ളിവിടരുതേ...

പാഠ്യേതര പ്രവർത്തനങ്ങളിൽ കുട്ടികൾ ഏർപ്പെടുന്നത് അവരുടെ വ്യക്തിഗത വളർച്ചയ്ക്ക് പ്രയോജനപ്രദമായ കാര്യമാണ്. സമ്മർദങ്ങളെ അകറ്റാനും സർ​ഗാത്മകമായി ചിന്തിക്കാനും പ്രവർത്തിക്കാനും ഇത് അവർക്ക് അവസരം നൽകുന്നു. പാഠ്യേതര പ്രവർത്തനങ്ങളിൽ ഏർപ്പെടുന്നത് ​ഗുണകരമാണെങ്കിലും ചിലപ്പോൾ മാതാപിതാക്കളുടെ നിർബന്ധത്തിനു വഴങ്ങി ഇതിനു തയാറാകേണ്ടി വരുന്ന കുട്ടികളുണ്ട്. മക്കളുടെ നല്ലതിനു വേണ്ടിയാണെങ്കിലും ഇങ്ങനെ നിർബന്ധിച്ചും പേടിപ്പിച്ചും കാര്യങ്ങൾ ചെയ്യുന്നതു തെറ്റാണ്. അതുപോലെ പഠനത്തിൽ ശ്രദ്ധിക്കാനായി പാഠ്യേതര പ്രവർത്തനങ്ങളിൽ നിന്നും മക്കളെ വിലക്കുന്ന മാതാപിതാക്കളുമുണ്ട്. ഇതും തെറ്റായ പ്രവണതയാണ്. മക്കളെ പാഠ്യേതര പ്രവർത്തനങ്ങളിൽ പങ്കെടുക്കാനായി പ്രോത്സാഹിപ്പിക്കണം. എന്നാൽ പ്രചോദനമാണ് നൽകേണ്ടതെന്നും നിർബന്ധിക്കുകയല്ല വേണ്ടതെന്നും മറക്കരുത്. മാതാപിതാക്കൾക്ക് ചെയ്യാനാകുന്ന ചില കാര്യങ്ങൾ ഇതാ.

വാതിൽ തുറന്നിടൂ

വ്യത്യസ്തമായ സാധ്യതകളിലേക്കുള്ള വാതിൽ തുറന്നിടുക. ആ മേഖല എന്താണെന്നും എങ്ങനെയാണെന്നും അവർ മനസ്സിലാക്കട്ടെ. പാഠ്യേതര പ്രവർത്തനങ്ങളിലേർപ്പെടുന്ന നാട്ടിലെയോ സ്കൂളിലെയോ കുട്ടികളുടെ സംഘടനകളിൽ അവരെ അംഗമാക്കാം. അവയുടെ പ്രവർത്തനങ്ങളിൽ ഇഷ്ടം തോന്നുകയാണെങ്കിൽ കുട്ടികൾ അതിന്റെ ഭാഗമായി പ്രവർത്തിക്കും. 

മാതൃക

ഇത്തരം പ്രവർത്തനങ്ങളിലൂടെ മാതൃകയാവാം. ഉദാഹരണത്തിന് ബാന്റ്മിന്റൺ കളിക്കാനോ സംഗീതോപകണം പഠിക്കാനോ ഉത്സാഹം കാണിക്കുന്ന മാതാപിതാക്കളെ കാണുമ്പോൾ മക്കൾക്കും അതിനു പ്രചോദനം ലഭിക്കും. ഇതുപോലെ വ്യത്യസ്തവും ക്രിയാത്കമവുമായ കാര്യങ്ങളിൽ ഏർപ്പെട്ട് സന്തുലിതവും സംതൃപ്തവുമായ ജീവിതം മാതാപിതാക്കൾ നയിക്കുമ്പോൾ മക്കൾ അതേ പാത പിന്തുടരും.

ശ്രമിച്ചു നോക്കൂ

ഒന്നോ രണ്ടോ ക്ലാസിനു പോയി ഇഷ്ടമായില്ലെങ്കിൽ വേണ്ടെന്നു വയ്ക്കാമല്ലോ എന്ന് അവരോട് പറയാം. കുട്ടി സംഗീതമോ നൃത്തമോ അഭ്യസിച്ചാൽ നന്നായിരിക്കും എന്നു നിങ്ങൾക്കുണ്ട്. അതിനു വേണ്ട കഴിവ് കുട്ടി പ്രകടിപ്പിക്കുന്നുമുണ്ട്. എന്നാൽ കുട്ടിക്ക് താൽപര്യമില്ല. അത്തരം സാഹചര്യത്തിൽ അവരോട് ഒന്നോ രണ്ടോ ക്ലാസിൽ പങ്കെടുക്കാനും എന്നിട്ടും താൽപര്യം തോന്നുന്നില്ലെങ്കിൽ വേണ്ടെന്നു വച്ചോളൂ എന്നും പറയുക. ഇതിലൂടെ അവരുടെ താൽപര്യത്തിനു തന്നെ മുൻ​ഗണന നൽകാനാവും. അതേസമയം ആ മേഖല മനസ്സിലാക്കാനും അഭിരുചിയുണ്ടെങ്കിൽ അതിൽ തുടരാനും ഇടവരും.

അന്തരീക്ഷം ഒരുക്കുക

കുട്ടിക്ക് അവരുടെ താൽപ്പര്യങ്ങൾ കണ്ടെത്താനും വികസിപ്പിക്കാനും സാധിക്കുന്ന അന്തരീക്ഷം സൃഷ്ടിക്കുക. വിവിധ പ്രവർത്തനങ്ങളെക്കുറിച്ച് കൂടുതലറിയാൻ അവരെ സഹായിക്കുന്ന പുസ്‌തകങ്ങൾ, ഓൺലൈൻ പ്ലാറ്റ്‌ഫോമുകൾ അല്ലെങ്കിൽ ക്ലാസുകൾ പോലുള്ള ഉറവിടങ്ങൾ അവർക്കു ലഭ്യമാക്കുക. വ്യത്യസ്‌ത പ്രവർത്തനങ്ങൾ പരീക്ഷിക്കാൻ അവരെ പ്രോത്സാഹിപ്പിക്കുക.

സംഭാഷണങ്ങൾ

നിങ്ങളുടെ കുട്ടിയുടെ താൽപ്പര്യങ്ങളെയും അഭിലാഷങ്ങളെയും കുറിച്ച് തുറന്നതും പിന്തുണ നൽകുന്നതുമായ സംഭാഷണങ്ങൾ നടത്തുക. അവരുടെ ആശയങ്ങൾ, സ്വപ്നങ്ങൾ, ലക്ഷ്യങ്ങൾ എന്നിവ ശ്രദ്ധിക്കുക. അവർക്ക് ജിജ്ഞാസയുള്ളതോ പരീക്ഷിക്കാൻ ആഗ്രഹിക്കുന്നതോ ആയ പ്രവർത്തനങ്ങളെക്കുറിച്ച് അവരോട് ചോദിക്കുക. അവരുടെ തിരഞ്ഞെടുപ്പുകളെ പിന്തുണയ്ക്കുക.

നേട്ടങ്ങൾ ഊന്നിപ്പറയുക

പാഠ്യേതര പ്രവർത്തനങ്ങളിൽ പങ്കെടുക്കുന്നതിന്റെ പ്രയോജനങ്ങൾ ചർച്ച ചെയ്യുക. പുതിയ കഴിവുകൾ വികസിപ്പിക്കുക, സൗഹൃദം കെട്ടിപ്പടുക്കുക, ആത്മവിശ്വാസം വർദ്ധിപ്പിക്കുക, ജീവിത പുരോ​ഗതി നേടുക തുടങ്ങിയ നേട്ടങ്ങളെ കുറിച്ച് പറയാം. അവ മനസ്സിലാക്കുമ്പോൾ കുട്ടിക്ക് ആ പ്രവർത്തനത്തിൽ താൽപര്യം തോന്നാം.

നേട്ടങ്ങൾ ആഘോഷിക്കുക

നിങ്ങളുടെ കുട്ടിയുടെ പാഠ്യേതര പ്രവർത്തനങ്ങളിലെ നേട്ടങ്ങളും നാഴികക്കല്ലുകളും തിരിച്ചറിയുകയും ആഘോഷിക്കുകയും ചെയ്യുക. അവരുടെ പരിശ്രമങ്ങളെയും മുന്നേറ്റത്തെയും അർപ്പണബോധത്തെയും പ്രശംസിക്കുക. അവരുടെ വിജയങ്ങൾ ആഘോഷിക്കുന്നത് അവരുടെ പ്രചോദനം ശക്തിപ്പെടുത്തുകയും തുടർന്നും പങ്കെടുക്കാൻ അവരെ പ്രോത്സാഹിപ്പിക്കുകയും ചെയ്യും.

കുട്ടിയുടെ മുൻഗണനകളെ മാനിക്കുകയും അവർക്ക് താൽപ്പര്യമില്ലാത്ത പ്രവർത്തനങ്ങളിൽ നിർബന്ധിച്ച് പങ്കെടുപ്പിക്കുന്നത് തെറ്റാണെന്ന് മറക്കാതിരിക്കുക. ഇത് കുട്ടികളെ സമ്മർദത്തിലേക്ക് തള്ളിവിടും. വിചാരിച്ചതിന്റെ നേർ വിപരീതഫലം ലഭിക്കാനുള്ള സാധ്യത അവിടെ കൂടുന്നു. 

Content Summary :  Extracurricular activities are important to students