പൗരപ്രമുഖരെയും സമുദായ നേതാക്കളെയും സന്ദർശിച്ച് സ്ഥാനാർഥികളുടെ പര്യടനം

മാവേലിക്കര
യുഡിഎഫ് സ്ഥാനാർഥി കൊടിക്കുന്നിൽ സുരേഷ് കൊട്ടാരക്കര മണ്ഡലത്തിലെ വിവിധ കശുവണ്ടി ഫാക്ടറികൾ സന്ദർശിച്ചു. കശുവണ്ടിത്തൊഴിലാളികളുടെ പിഎഫ് പെൻഷൻ 3000 രൂപയാക്കി ഉയർത്തുമെന്നു പറഞ്ഞു. ഡൽഹി മുഖ്യമന്ത്രി അരവിന്ദ് കേജ്‌രിവാളിനെ അറസ്റ്റ് ചെയ്തതിൽ പ്രതിഷേധിച്ചു മാവേലിക്കര ബ്ലോക്ക് കോൺഗ്രസ് കമ്മിറ്റി നടത്തിയ പ്രകടനവും പൊതുയോഗവും  ഉദ്ഘാടനം ചെയ്തു. 

എൽഡിഎഫ് സ്ഥാനാർഥി സി.എ.അരുൺകുമാർ മാവേലിക്കര സെന്റ് തോമസ് മാർത്തോമ്മ പള്ളി, കോടതി, ബിഷപ് മൂർ കോളജ്, ആദിക്കാട്ടുകുളങ്ങര ജുമാ മസ്ജിദ്  എന്നിവിടങ്ങളിലെത്തി വോട്ടു തേടി. 

എൻഡിഎ സ്ഥാനാർഥി ബൈജു കലാശാല കൊട്ടാരക്കര മണ്ഡലത്തിൽ പര്യടനം നടത്തി. മൈലം കശുവണ്ടി ഫാക്ടറി, കൊട്ടാരക്കര ബസ് സ്റ്റാൻഡ് എന്നിവിടങ്ങളിലെത്തി വോട്ട് അഭ്യർഥിച്ചു. സമുദായ നേതാക്കളെ സന്ദർശിച്ചു. 

ആലപ്പുഴ 
എൽഡിഎഫ് സ്ഥാനാർഥി എ.എം.ആരിഫ് ചേർത്തല എസ്എൻ കോളജ്, സെന്റ് മൈക്കിൾസ് കോളജ്, ചേർത്തല പോളി ടെക്നിക് എന്നിവിടങ്ങളിലെത്തി വോട്ടുതേടി. വലിയ ചുടുകാട്ടിൽ സി.കെ.ചന്ദ്രപ്പൻ അനുസ്മരണത്തിലും പുഷ്പാർച്ചനയിലും പങ്കെടുത്തു. മണ്ഡലം കൺവൻഷനുകളിൽ ഊന്നിയായിരുന്നു യുഡിഎഫ് സ്ഥാനാർഥി കെ.സി.വേണുഗോപാലിനു വേണ്ടിയുള്ള പ്രചാരണം. മുല്ലയ്ക്കൽ മണ്ഡലം കൺവൻഷൻ എ.പി.അനിൽകുമാർ എംഎൽഎ, കണിച്ചുകുളങ്ങര മണ്ഡലം കൺവൻഷൻ കെപിസിസി ജനറൽ സെക്രട്ടറി എ.എ.ഷുക്കൂർ, തുറവൂർ വെസ്റ്റ് മണ്ഡലം കൺവൻഷൻ യൂത്ത് കോൺഗ്രസ് ജില്ലാ പ്രസിഡന്റ് എം.പി.പ്രവീൺ എന്നിവർ ഉദ്ഘാടനം ചെയ്തു.  എൻഡിഎ സ്ഥാനാർഥി ശോഭ സുരേന്ദ്രൻ കായംകുളത്ത് റോഡ് ഷോ നടത്തി. ആലപ്പുഴയിലെ കയർ ഫാക്ടറികളിലെത്തി  തൊഴിലാളികളോടു വോട്ടു തേടി. സാമുദായിക നേതാക്കളെ സന്ദർശിച്ചു.

സ്ഥാനാർഥികൾ  ഇന്ന്
ആലപ്പുഴ
∙ യുഡിഎഫ് സ്ഥാനാർഥി കെ.സി.വേണുഗോപാൽ ആലപ്പുഴ ജില്ലാ കോടതി മുതൽ മണ്ണ‍ഞ്ചേരി, മുഹമ്മ, തണ്ണീർമുക്കം വഴി ചേർത്തല വരെ റോഡ്ഷോ നടത്തും. വിവിധ സ്ഥാപനങ്ങൾ സന്ദർശിക്കും. പെരുമ്പളം, പള്ളിപ്പുറം എന്നിവിടങ്ങളിൽ പരിപാടികളിൽ പങ്കെടുക്കും. ലജ്നത്തുൽ മുഹമ്മദീയ സംഘടിപ്പിക്കുന്ന ഇഫ്താർ വിരുന്നിൽ പങ്കെടുക്കും.
∙ എൽഡിഎഫ് സ്ഥാനാർഥി എ.എം.ആരിഫ് ആലപ്പുഴ, ചേർത്തല മണ്ഡലങ്ങളിലെ സ്ഥാപനങ്ങൾ സന്ദർശിക്കുന്നു.
∙ എൻഡിഎ സ്ഥാനാർഥി ശോഭാ സുരേന്ദ്രൻ വൈകിട്ട് 3നു ഭരണിക്കാവ് പഞ്ചായത്ത് ഓഫിസ് ഉദ്ഘാടനം ചെയ്യും. 4 മുതൽ കായംകുളത്തു റോഡ്ഷോ നടത്തും.

മാവേലിക്കര
∙ യുഡിഎഫ് സ്ഥാനാർഥി കൊടിക്കുന്നിൽ സുരേഷ് മാവേലിക്കര, ചെങ്ങന്നൂർ, ചങ്ങനാശേരി നിയോജക മണ്ഡലം കൺവൻഷനുകളിൽ പങ്കെടുക്കും.
∙ എൽഡിഎഫ് സ്ഥാനാർഥി സി.എ.അരുൺകുമാർ കുന്നത്തൂരിലും കുട്ടനാട്ടിലും പ്രചാരണം നടത്തും. വിവിധ സ്ഥാപനങ്ങളും വ്യക്തികളെയും സന്ദർശിക്കും. കുടുംബയോഗങ്ങളിലും പങ്കെടുക്കും.
∙ എൻഡിഎ സ്ഥാനാർഥി ബൈജു കലാശാല ചക്കുളത്തുകാവ് മുതൽ എടത്വ വഴി വീയപുരം വരെ റോഡ്ഷോ നടത്തും. മാടപ്പള്ളി പ്രദേശത്തെ വിവിധ പരിപാടികളിൽ പങ്കെടുക്കും.