ബജറ്റ്: റോഡ് വികസനത്തിൽ പ്രതീക്ഷയർപ്പിച്ച് മലയോരം

കമ്പല്ലൂർ∙ബജറ്റിൽ പ്രഖ്യാപിച്ച റോഡ് വികസനത്തിൽ പ്രതീക്ഷയർപ്പിച്ച് മലയോര ഗ്രാമങ്ങൾ. ഈസ്റ്റ് എളേരി, വെസ്റ്റ് എളേരി പഞ്ചായത്തുകളെ തമ്മിൽ ബന്ധിപ്പിക്കുന്ന ചെമ്മരംകയം–കൊല്ലാട–ആയന്നൂർ–മണക്കടവ് റോഡ് ആധുനികവൽക്കരിക്കുന്നതിനാണു സംസ്ഥാന ബജറ്റിൽ 5 കോടി രൂപ വകയിരുത്തിയിട്ടുള്ളത്.ചെമ്മരംകയത്തുനിന്നു ചെറുപുഴയിൽനിന്നു കമ്പല്ലൂർ, കടുമേനി, പാടിയോട്ടുചാൽ, ചീമേനി ടൗണുകളിലേക്ക് എളുപ്പത്തിൽ എത്തിച്ചേരാൻ കഴിയുന്ന റോഡാണിത്.  ഈ റോഡിന്റെ ഭാഗമായ ആയന്നൂർ–കൊല്ലാട റോഡ്, കെ.കുഞ്ഞിരാമൻ എംഎൽഎയായിരിക്കെ ആസ്ഥിവികസന ഫണ്ടിൽ ഉൾപ്പെടുത്തിയാണ് 50 ലക്ഷം രൂപ ചെലവിൽ നവീകരിച്ചത്.

എന്നാൽ കാലപ്പഴക്കത്താൽ ഈ റോഡ് ഇപ്പോൾ തകർന്ന നിലയിലാണ്. ചെറുപുഴ ചെക്ഡാം – അരിമ്പ– കടുമേനി, ചെക്ഡാം – ആയന്നൂർ – കൊല്ലാട, കൊല്ലാട – കമ്പല്ലൂർ – ചെമ്മരംകയം എന്നീ ഗ്രാമീണ റോഡുകളാണ് ഈ പദ്ധതി നിലവിൽ വരുന്നതോടെ നവീകരിക്കുക. മലയോര ഗ്രാമങ്ങളുടെ വികസനത്തിലേക്കു വഴിതുറക്കും വിധത്തിലുള്ള ഈ റോഡുകൾ ആധുനികവൽകരിക്കുന്നതോടെ മലയോരത്തെ ഉൾഗ്രാമങ്ങളിലെ വിദ്യാർഥികൾ ഉൾപ്പെടെയുള്ളവരുടെ യാത്രാക്ലേശത്തിനും ഒരു പരിധിവരെ പരിഹാരമാകും.