പാലക്കാട് ∙ ബെംഗളൂരുവിൽ നിന്നു തൃശൂരിലേക്ക് വന്ന സ്വകാര്യ ഹെലികോപ്റ്റർ പ്രതികൂല കാലാവസ്ഥയെ തുടർന്ന് പാലക്കാട് ഇന്ദിരാഗാന്ധി മുനിസിപ്പൽ സ്റ്റേഡിയത്തിൽ ഇറക്കി. ഇന്നലെ ഉച്ചയ്ക്കാണ് സംഭവം. അപ്രതീക്ഷിതമായി ഹെലികോപ്റ്റർ എത്തിയതോടെ ജനങ്ങൾ ആശങ്കയിലായി. ഇതിനിടെ പൊലീസ് സ്ഥലത്തെത്തി വിവരങ്ങൾ ആരാഞ്ഞു.
തൃശൂരിലെ സ്വകാര്യ കമ്പനിയിലേക്കു വന്ന ചിപ്പ്സൻ എവിയേഷന്റെ യാത്രാ ഹെലികോപ്റ്ററാണ് ഇറക്കിയത്. ഹെലികോപ്റ്റർ ഇറങ്ങിയതറിഞ്ഞ് ഒട്ടേറെ പേർ കാണാനെത്തിയതോടെ പൊലീസ് നിയന്ത്രണം വരുത്തി. തൃശൂരിലെ കാലാവസ്ഥ അനുകൂലമായതോടെ ഉച്ചയ്ക്കു മൂന്നോടെ ഹെലികോപ്റ്റർ യാത്ര തുടർന്നു.
