പടപ്പയ്ക്കൽ മേഖലയിൽ തെരുവുനായ് ശല്യം രൂക്ഷം: നാട്ടുകാർ ഭീതിയിൽ

അരുവാപ്പുലം ∙ പടപ്പയ്ക്കലിൽ തെരുവുനായ്ക്കളുടെ ശല്യം രൂക്ഷമായി. കഴിഞ്ഞ രാത്രിയിൽ ചെമ്പിലാക്കൽ മേലേതിൽ ചന്ദ്രികയുടെ വീട്ടിൽ പുലർച്ചെ 3ന് തെരുവുനായ്ക്കൾ കൂട്ടമായി വന്ന് 3 കോഴികളെ ഭക്ഷിച്ചു. ഇരുമ്പ് വല കടിച്ചിളക്കി കോഴിക്കൂട്ടിനകത്ത് കയറിയാണ് കോഴികളെ പിടിച്ചത്. 

ബഹളം കേട്ട് വീട്ടുകാർ എത്തി നായ്ക്കളെ അടിച്ചോടിക്കുകയായിരുന്നു. ഇവ മറ്റു വീടുകളിലും എത്തി കോഴികളെ കൊന്നുതിന്നുന്നത് പതിവാകുന്നതായി പരാതിയുണ്ട്. അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.