റോഡ് നന്നാക്കാൻ ശയന പ്രദക്ഷിണം നടത്തി, ജയൻ ചെങ്ങറ

ചെങ്ങറ ∙ നാടുകാണി എസ്എൻഡിപി ജംക്‌ഷൻ - കിഴക്കുപുറം റോഡ് സഞ്ചാരയോഗ്യമാക്കണമെന്നാവശ്യപ്പെട്ട് ഓട്ടോറിക്ഷ ഡ്രൈവർ ജയൻ ചെങ്ങറയുടെ ശയന പ്രദക്ഷിണം. പൊട്ടിപ്പൊളിഞ്ഞ റോഡിൽ വാഴ നട്ടതിനു ശേഷമാണ് പൊളിഞ്ഞ റോഡിൽ ശയന പ്രദക്ഷിണം നടത്തിയത്. കോന്നി പഞ്ചായത്തിലെ 3-ാം വാർഡിലെ മൂന്നാം പഞ്ചായത്ത്‌ റോഡാണ് പൊട്ടി പൊളിഞ്ഞു സഞ്ചാരയോഗ്യമല്ലാതായി കിടക്കുന്നത്. വർഷങ്ങളായി തകർന്നു കിടക്കുന്ന റോഡ് നന്നാക്കണമെന്നുള്ളത് നാട്ടുകാരുടെ ദീർഘകാലത്തെ ആവശ്യമായിരുന്നു. റോഡിന്റെ അറ്റകുറ്റപ്പണികൾക്ക് പണം അനുവദിച്ചിട്ടും പണികൾ തുടങ്ങാൻ വൈകുന്നതിൽ പ്രതിഷേധിച്ചായിരുന്നു ഒറ്റയാൾ സമരം. റോഡ് സഞ്ചാരയോഗ്യമാക്കാൻ പഞ്ചായത്ത് 7 മാസം മുൻപ് 6 ലക്ഷം രൂപ അനുവദിച്ചിരുന്നു. ഇനിയും പണികൾ നടത്താത്തത് സംബന്ധിച്ച് സമര പരിപാടികൾ ആരംഭിക്കുമെന്ന് കാട്ടി കഴിഞ്ഞ ദിവസം സെക്രട്ടറിക്ക് രേഖാമൂലം അറിയിപ്പ് നൽകിയിരുന്നതായി വാർഡംഗം ജോയിസ് ഏബ്രഹാം പറഞ്ഞു. ഭരണസമിതിക്കെതിരെയുള്ള പ്രതിഷേധം പഞ്ചായത്ത് ഓഫിസിനു മുൻപിലായിരുന്നു വേണ്ടതെന്നും ജോയിസ് ഏബ്രഹാം പറഞ്ഞു.