കാട്ടാനയുടെ ആക്രമണത്തിൽ തോട്ടം കാവൽക്കാരന് പരുക്ക്

ഗൂഡല്ലൂർ ∙ കാട്ടാനയുടെ ആക്രമണത്തിൽ വയോധികന് ഗുരുതര പരുക്ക്. ദേവർഷോലയിലെ കടച്ചനക്കൊല്ലി ഗോത്ര ഗ്രാമത്തിലെ മടമ്പനാണു (60) പരുക്കേറ്റത്. ഇയാളെ ഊട്ടി മെഡിക്കൽ കോളജിൽ പ്രവേശിപ്പിച്ചു. ദേവർഷോലയിലെ സ്വകാര്യ തോട്ടത്തിൽ കാവൽക്കാരനായിരുന്നു. തോട്ടത്തിലെ മറ്റ് ജോലിക്കാർക്കൊപ്പം കാവലിനു പോകുമ്പോഴാണു കാട്ടാന ആക്രമിച്ചത്. കൂടെ ഉണ്ടായിരുന്നവർ കാട്ടാനയെ തുരത്തി മടമ്പനെ ആശുപത്രിയിൽ പ്രവേശിപ്പിച്ചു. ഇരു കാലുകളിലും ഗുരുതരമായി പരുക്കേറ്റിട്ടുണ്ട്.