ഇപ്പോൾ കേന്ദ്ര സർക്കാരും തിരിച്ചറിഞ്ഞിരിക്കുന്നു; വിദേശ ജോലി നേടാം ഈസിയായി

മലയാളികൾ പണ്ടേ മനസ്സിലാക്കിയ കാര്യം ഇപ്പോൾ കേന്ദ്ര സർക്കാരും തിരിച്ചറിഞ്ഞിരിക്കുന്നു; ഇന്ത്യയിൽ നിന്നുള്ള നഴ്സുമാരും അധ്യാപകരും ഫാർമസിസ്റ്റുകളും മുതൽ പരിചാരകർക്കു വരെ വിദേശത്തു വൻ ഡിമാൻഡാണ്. ഇതു മുതലെടുക്കാൻ രാജ്യത്തെ യുവതീയുവാക്കൾക്കായി പ്രത്യേക ബ്രിജ് കോഴ്സ് തുടങ്ങുമെന്ന പ്രഖ്യാപനം ബജറ്റിലുണ്ട്. ഓരോ മേഖലയിലെയും നൈപുണ്യം മെച്ചപ്പെടുത്താനും വിദേശഭാഷകളിൽ അടക്കം പരിശീലനം നൽകാനും സഹായിക്കുന്നതാകും ബ്രിജ് കോഴ്സ്. ആരോഗ്യ മന്ത്രാലയവും നൈപുണ്യ വികസന മന്ത്രാലയവും ചേർന്നു കോഴ്സിന് അന്തിമരൂപം നൽകും.

ആരോഗ്യമേഖലയിൽ ഫിസിയോതെറപ്പിസ്റ്റുകൾ, നഴ്സുമാർ, ആയുഷ് ഡോക്ടർമാർ എന്നിവർക്കായി ബ്രിജ് കോഴ്സ് തുടങ്ങാൻ നിർദേശിക്കുന്ന നാഷനൽ മെഡിക്കൽ കമ്മിഷൻ ബിൽ കഴിഞ്ഞ വർഷം അവതരിപ്പിച്ചതു വൻ പ്രതിഷേധത്തിന് ഇടയാക്കിയിരുന്നു.