നഴ്സിങ്: സൈന്യത്തിലും വിദേശത്തും മികച്ച തൊഴിലും വരുമാനവും നേടാം

സൈന്യത്തിലും വിദേശത്തുമുള്ള നഴ്സിങ് ഒഴിവുകൾ ഏറ്റവും കൂടുതൽ പ്രയോജനപ്പെടുത്തുന്ന സംസ്ഥാനങ്ങളിലൊന്നാണു കേരളം. മികച്ച തൊഴിൽ സാഹചര്യവും വരുമാനവും ഈ നഴ്സിങ് ജോലികളെ കൂടുതൽ ശ്രദ്ധേയമാക്കുന്നു. 

മിലിട്ടറി നഴ്സിങ്  

സൗജന്യമായി പഠിച്ച് സായുധ സേനയിൽ കമ്മിഷൻഡ് ഓഫിസറായി അഭിമാനകരമായ സേവനത്തിന് അവസരം ലഭിക്കുന്നുവെന്നതാണു മിലിട്ടറി നഴ്സിങ് സർവീസിന്റെ പ്രത്യേകത. 

∙ഫീസില്ല, സ്റ്റൈപെൻഡ് ലഭിക്കും. താമസവും ഭക്ഷണവും യൂണിഫോമും തീർത്തും സൗജന്യം.

പുണെ, കൊൽക്കത്ത, മുംബൈ, ഡൽഹി, ലക്നൗ, ബെംഗളൂരു എന്നിവിടങ്ങളിലെ സൈനിക ആശുപത്രികളോടു ചേർന്നുള്ള നഴ്സിങ് കോളജുകളിലാണ് നാലു വർഷത്തെ ബിഎസ്‌സി നഴ്‌സിങ് പരിശീലനം. 

∙അവിവാഹിതർ, പ്രാരാബ്‌ധങ്ങളില്ലാത്ത വിധവകൾ/വിവാഹമുക്‌തകൾ എന്നിവരെയാണു പ്രവേശനത്തിനു പരിഗണിക്കുക. ആൺകുട്ടികൾക്കു പ്രവേശനമില്ല. ∙ബയോളജി, ഫിസിക്‌സ്, കെമിസ്‌ട്രി, ഇംഗ്ലിഷ് എന്നിവയ്‌ക്ക് 50% എങ്കിലും മൊത്തം മാർക്കോടെ ആദ്യ ചാൻസിൽത്തന്നെ പ്ലസ് ടു ജയിച്ചിരിക്കണം. പ്ലസ് ടുവിൽ പഠിക്കുന്നവർക്കും അപേക്ഷിക്കാം. റഗുലറായി പഠിച്ചവർക്കേ പ്രവേശനമുള്ളൂ. മാർക്കിളവില്ല. പ്രായം 17–25. 

∙152 സെ.മീ. എങ്കിലും ഉയരവും ആനുപാതിക തൂക്കവും വേണം. മിലിട്ടറി മാനദണ്ഡപ്രകാരമുള്ള ആരോഗ്യനിലവാരം നിർബന്ധം. മാനസികാരോഗ്യവും പ്രധാനം. ശാരീരികവൈകല്യം പാടില്ല. വിശദാംശങ്ങൾ വെബ്സൈറ്റിലുണ്ട്. 

∙മിലിട്ടറി നഴ്‌സിങ് സർവീസിൽ ചേരാമെന്നു തുടക്കത്തിൽ കരാർ ഒപ്പിടണം. ഇടയ്ക്കു വിട്ടുപോയാലോ കമ്മിഷൻ നിരസിച്ചാലോ കരാർ തുക അടയ്ക്കണം.

∙ഓൺലൈൻ എൻട്രൻസ് പരീക്ഷയിൽ മികവു പുലർത്തണം. 90 മിനിറ്റ് ടെസ്‌റ്റിൽ ജനറൽ ഇംഗ്ലിഷ്, ബയോളജി, ഫിസിക്‌സ്, കെമിസ്‌ട്രി, ജനറൽ ഇന്റലിജൻസ് എന്നീ വിഷയങ്ങളിൽ ഒബ്‌ജെക്‌ടീവ് ചോദ്യങ്ങൾ പ്രതീക്ഷിക്കാം. 

∙എഴുത്തുപരീക്ഷയും ഇന്റർവ്യൂവും വിലയിരുത്തിയാണു സിലക്‌ഷൻ. വിശദമായ വൈദ്യപരിശോധനാ റിപ്പോർട്ടും തൃപ്‌തികരമാവണം.വെബ്: www.joinindianarmy.nic.in. 

വിദേശത്തു നഴ്സ് 

പാശ്ചാത്യ രാജ്യങ്ങളിലും ഗൾഫ് മേഖലയിലും വളരെ ഉയർന്ന വേതനത്തോടെ പതിനായിരക്കണക്കിനു നഴ്‌സുമാർക്കു ജോലിസാധ്യതയുണ്ട്. 

∙നഴ്സിങ് പരീക്ഷായോഗ്യതയ്ക്കു പുറമെ ഇംഗ്ലിഷ് ഭാഷാസാമർഥ്യമടക്കം വിവിധ ശേഷികൾ പരിശോധിച്ച് ഉറപ്പു വരുത്തുന്ന സിജിഎഫ്എൻഎസ് (www.cgfns.org)/എൻസിലെക്സ്–ആർഎൻ (www.ncsbn.org) യോഗ്യത നേടണം. ഇംഗ്ലിഷ് ഭാഷാപ്രാവീണ്യം തെളിയിക്കാൻ ഐഇഎൽടിഎസ് (www.ielts.org), ടോഫൽ (www.ets.org/toefl), ഒഇടി (www.occupationalenglishtest.org) പരീക്ഷകളിൽ സർട്ടിഫിക്കറ്റ് വേണം. ഈ പരീക്ഷകൾ ഇന്ത്യയിൽ എഴുതാം. വിദേശത്തെ നഴ്സിങ് ഒഴിവുകൾ കണ്ടെത്താൻ www.nursesnet.com എന്ന സൈറ്റ് സഹായിക്കും.

∙സാധാരണക്കാരുമായി തട്ടും തടവും കൂടാതെ സംസാരിക്കാനും കൃത്യമായി കേട്ടുമനസ്സിലാക്കാനുമുള്ള കഴിവാണു മുഖ്യമായി വിലയിരുത്തുക. ഈ ടെസ്റ്റുകളിലെല്ലാം നാലു ശേഷികളാണു വിലയിരുത്തുന്നത്: ശ്രദ്ധിച്ചു കേൾക്കുക, വായിക്കുക, എഴുതുക, സംസാരിക്കുക. യഥാക്രമം Listening, Reading, Writing, Speaking എന്നിവ. 

∙യുഎസിൽ പൊതുവെ ടോഫലിലെയും യുകെ, ഓസ്ട്രേലിയ, ന്യൂസീലാൻഡ് തുടങ്ങിയ രാജ്യങ്ങളിൽ ഐഇഎൽടിഎസ്/ഒഇടി എന്നിവയിലെയും സ്കോറാണു പരിഗണിക്കുക. യുഎഇ അടക്കം ഇവ രണ്ടും സ്വീകരിക്കുന്ന പല രാജ്യങ്ങളുമുണ്ട്. പിടിഇ (പിയേഴ്സൻ ടെസ്റ്റ് ഓഫ് ഇംഗ്ലിഷ് അക്കാഡമിക് പ്രാക്ടീസ്), ടിഒഇഐസി (www.ets.org/toeic) എന്നീ ടെസ്റ്റുകളുമുണ്ടെങ്കിലും ഇവിടെ അവയ്ക്കു പ്രചാരം കുറവാണ്.

English Summary: Career Scope Of Nursing