കാർഷിക അഖിലേന്ത്യാ ക്വോട്ട: ബിരുദ പ്രവേശനം സിയുഇടി വഴി

അഗ്രികൾചറിലും അനുബന്ധവിഷയങ്ങളിലുമുള്ള യുജി, പിജി, പി എച്ച്ഡി പ്രോഗ്രാമുകളിൽ 2024–’25ലെ ഓൾ ഇന്ത്യാ ക്വോട്ട പ്രവേശനം സംബന്ധിച്ച് ഐസിഎആർ (ഇന്ത്യൻ കൗൺസിൽ ഓഫ് അഗ്രികൾചറൽ റിസർച് – www.icar.org.in) സൂചന നൽകി.

∙ യുജി പ്രോഗ്രാമുകൾ
പ്രവേശനം സിയുഇടി (യുജി)– 2024 വഴിയായിരിക്കും. ഈ മാസം 26നു രാത്രി 11.50 വരെ https://exams.nta.ac.in/CUET-UG എന്ന സൈറ്റിലെ റജിസ്ട്രേഷൻ ലിങ്ക്‌ വഴി അപേക്ഷിക്കാം. വിശദവിവരങ്ങൾ ആ സൈറ്റിലെ ഇൻഫർമേഷൻ ബുള്ളറ്റിനിലുണ്ട്. പക്ഷേ, സിയുഇടി (ഐസിഎആർ – യുജി) സംബന്ധിച്ച വിശദാംശങ്ങൾക്ക് ഐസിഎആർ സൈറ്റിലെ വിശേഷ ബുള്ളറ്റിനും നോക്കണം. ഇതനുസരിച്ച് താഴെപ്പറയുന്ന 12 പ്രോഗ്രാമുകളിലെ പ്രവേശനമാണു നടത്തുക. (കഴിഞ്ഞവർഷം ഇന്ത്യയിലാകെ ഈ പ്രോഗ്രാമുകളിൽ 5221 സീറ്റുകളുണ്ടായിരുന്നു).

∙ ബിഎസ്‌സി (ഓണേഴ്സ്)
അഗ്രികൾചർ, ഹോർട്ടികൾചർ, ഫിഷറീസ്, ഫോറസ്ട്രി, കമ്യൂണിറ്റി സയൻസ്, ഫുഡ് ന്യൂട്രീഷൻ & ഡയറ്ററ്റിക്സ്, സെറികൾചർ, നാച്വറൽ ഫാമിങ്

∙ ബിടെക്
 അഗ്രികൾചറൽ എൻജിനീയറിങ്, ഡെയറി ടെക്നോളജി, ഫുഡ് ടെക്നോളജി, ബയോടെക്നോളജി ദേശീയതലത്തിൽ ഈ പ്രവേശനത്തിൽപെടുന്ന എല്ലാ സർവകലാശാലകളിലെയും ഓരോ പ്രോഗ്രാമിനുമുള്ള ഐസിഎആർ ക്വോട്ടാ സീറ്റുകൾ ഇനംതിരിച്ച് ബുള്ളറ്റിനിലുണ്ട്. കേരളത്തിലെ കാർഷിക / ഫിഷറീസ് / വെറ്ററിനറി സർവകലാശാലകളും ഇവയിൽപെടും. ബാച്‌ലർ ഓഫ് വെറ്ററിനറി സയൻസ് പ്രോഗ്രാം ഇതിൽപെടില്ല.

∙പിജി, പിഎച്ച്ഡി
കാർഷിക പിജി / പിഎച്ച്ഡി പ്രോഗ്രാമുകളിലെ പ്രവേശനം ഐസിഎആറിന്റെ AIEEA (ഓൾ ഇന്ത്യാ എൻട്രൻസ് എക്സാമിനേഷൻ ഫോർ അഡ്മിഷൻ) / AICE (ഓൾ ഇന്ത്യാ കോംപറ്റീറ്റിവ് എക്സാമിനേഷൻ ഫോർ അഡ്മിഷൻ) എന്നീ പരീക്ഷകൾ വഴിയായിരിക്കും. ഇവ രണ്ടും മിക്കവാറും ജൂൺ 15നു നാഷനൽ ടെസ്റ്റിങ് ഏജൻസി നടത്തിയേക്കുമെന്നും ഐസിഎആർ അറിയിച്ചു.