‘ഗേറ്റ്’ പരീക്ഷ ഫെബ്രുവരി 3 മുതൽ: അപേക്ഷിക്കാം ആഗസ്റ്റ് 24 മുതൽ

ന്യൂഡൽഹി ∙ എൻജിനീയറിങ്, ആർക്കിടെക്ചർ വിഷയങ്ങളിലും മറ്റും ഉപരിപഠനത്തിനുള്ള ദേശീയ യോഗ്യതാപരീക്ഷ ‘ഗേറ്റ്’ (ഗ്രാജ്വേറ്റ് ആപ്റ്റിറ്റ്യൂഡ് ടെസ്റ്റ് ഇൻ എൻജിനീയറിങ്) 2024 ഫെബ്രുവരി 3,4,10,11 തീയതികളിൽ നടക്കും. മാർച്ച് 16നു ഫലം പ്രഖ്യാപിക്കും. 3 വർഷമാണ് സ്കോർ കാലാവധി. പ്രമുഖ പൊതുമേഖലാസ്‌ഥാപനങ്ങളിൽ ജോലിക്കും ഗേറ്റ് സ്കോർ പരിഗണിക്കാറുണ്ട്.

Read Also : ബിരുദാനന്തര ബിരുദം യുഎസിൽ ചെയ്യാനാണോ ആഗ്രഹം?; പ്രവേശനം നേടും മുൻപ് അറിയണം ചിലത്

ഈ മാസം 24 മുതൽ അപേക്ഷ സ്വീകരിച്ചുതുടങ്ങുമെന്നു പ്രതീക്ഷിക്കുന്നു. സെപ്റ്റംബർ 29 വരെ ലേറ്റ് ഫീ കൂടാതെയും ഒക്ടോബർ 13 വരെ ലേറ്റ് ഫീയോടെയും അപേക്ഷിക്കാമെന്ന് പരീക്ഷച്ചുമതലയുള്ള ഐഐഎസ്‌സി ബെംഗളൂരു അറിയിച്ചു. നവംബർ 7 മുതൽ 11 വരെ അപേക്ഷയിൽ വേണ്ട തിരുത്തലുകൾ വരുത്താം. അഡ്മിറ്റ് കാർഡ് ജനുവരി മൂന്നിനു ഡൗൺലോഡ് ചെയ്യാം.

പുതുതായി ഉൾപ്പെടുത്തിയ ‘ഡേറ്റ സയൻസ് & ആർട്ടിഫിഷ്യൽ ഇന്റലിജൻസ്’ ഉൾപ്പെടെ മൊത്തം 30 പേപ്പറുകളിൽ പരീക്ഷ നടത്തും. എൻജിനീയറിങ് വിഷയങ്ങൾക്കു പുറമേ കെമിസ്ട്രി, ഫിസിക്സ്, മാത്‌സ്, സ്റ്റാറ്റിസ്റ്റിക്സ്, ജിയോളജി ആൻഡ് ജിയോഫിസിക്സ്, ഹ്യുമാനിറ്റീസ് ആൻഡ് സോഷ്യൽ സയൻസസ്, ലൈഫ് സയൻസസ് എന്നിവയുമുണ്ട്. ഒരാൾക്കു പരമാവധി 2 പേപ്പറുകൾ എഴുതാം. ഒന്നാം ചോയ്സായി തിരഞ്ഞെടുക്കുന്ന പേപ്പർ അനുസരിച്ച് രണ്ടാം ചോയ്സായി എഴുതാവുന്ന പേപ്പറുകളുടെ പട്ടിക സൈറ്റിലുണ്ട്. gate2024.iisc.ac.in

Content Summary : GATE 2024 Exam To Begin From February 3