ജെഇഇ അഡ്വാൻസ്ഡ് അപേക്ഷ 27 മുതൽ

ന്യൂഡൽഹി ∙ ഐഐടി പ്രവേശനത്തിനുള്ള ജെഇഇ അഡ്വാൻസ്ഡ് പരീക്ഷയുടെ റജിസ്ട്രേഷൻ 27ന് ആരംഭിക്കും. മേയ് 7ന് വൈകിട്ട് 5 വരെ റജിസ്റ്റർ ചെയ്യാം. റജിസ്ട്രേഷൻ നടപടികൾ ഈ മാസം 21 മുതൽ 30 വരെ നടക്കുമെന്നാണു നേരത്തെ അറിയിച്ചിരുന്നതെങ്കിലും പരീക്ഷാ നടത്തിപ്പുകാരായ ഐഐടി മദ്രാസ് തീയതിയിൽ മാറ്റം വരുത്തി. 

മേയ് 10നു വൈകിട്ട് 5 വരെ ഫീസ് അടയ്ക്കാം. 17 മുതൽ 26 വരെ അഡ്മിറ്റ് കാർഡ് ലഭ്യമാക്കും. അതേസമയം, പരീക്ഷാ തീയതിയിൽ മാറ്റമില്ല. മുൻ നിശ്ചയിച്ച പ്രകാരം മേയ് 26നു തന്നെയാകും പരീക്ഷ. രാവിലെ 9 മുതൽ 12 വരെ പേപ്പർ ഒന്നും ഉച്ചകഴിഞ്ഞ് 2.30 മുതൽ 5.30 വരെ പേപ്പർ രണ്ടും നടക്കും. ഫലം ജൂൺ 15നു പ്രസിദ്ധീകരിക്കും. 3200 രൂപയാണു ഫീസ്. പെൺകുട്ടികൾക്കും സംവരണ വിഭാഗത്തിലുള്ളവർക്കും 1600 രൂപയാണു ഫീസ്.