കേരളത്തിൽ അങ്ങോളമിങ്ങോളം ഓടിക്കളിക്കുന്ന ആനവണ്ടിയുടെ ‘കെഎസ്ആർടിസി’ എന്ന പേര് തങ്ങൾക്ക് അവകാശപ്പെട്ടതാണെന്ന് പറഞ്ഞ് പണ്ട് കർണാടക ഒരു നീക്കം നടത്തിയിരുന്നു. കോടതിയിലെ നിയമനടപടികളിൽ കേരളം ഹാജരാക്കിയ വിവിധ രേഖകളുടെ അടിസ്ഥാനത്തിൽ ഒടുവിൽ ആ നീക്കം അവസാനിച്ചു. കെഎസ്ആർടിസി കേരളത്തിനു സ്വന്തമായി. ഇപ്പോഴിതാ കേരളത്തിനു കൂടി സ്വന്തമെന്ന് അവകാശപ്പെടാവുന്ന മറ്റൊന്നും കർണാടക അവരുടേതാക്കാനുള്ള ശ്രമത്തിലാണ്. സംഗതി മറ്റൊന്നുമല്ല – ഒരു ഇത്തിരിക്കുഞ്ഞൻ തവളയാണ്. മലബാർ ട്രീ ടോഡ് എന്നാണ് പേര്. മലയാളത്തിൽ മരച്ചൊറിയൻ തവള എന്നു വിളിക്കും. ശാസ്ത്രീയ നാമം: Pedostibes tuberculosus.