തേനീച്ചകള്ക്കും ലോക്ഡൗണ്; സഞ്ചാരം നിയന്ത്രിച്ച് ഓസ്ട്രേലിയ, നിയന്ത്രണങ്ങൾക്കു പിന്നിൽ?
Mail This Article
തേനീച്ചകള്ക്ക് ലോക്ഡൗണ് ഏര്പ്പെടുത്തിയിരിക്കുകയാണ് ഓസ്ട്രേലിയ. ഓസ്ട്രേലിയയിലെ ന്യൂ സൗത്ത് വെയില്സിലാണ് വറോവ ഡിസ്ട്രക്ടറിന്റെ വ്യാപനം കണ്ടെത്തിയതോടെ തേനീച്ചകളുടെ സഞ്ചാരം നിയന്ത്രിച്ചത്. കര്ഷകര് തേനീച്ചകളെയോ തേനീച്ചക്കൂടുകളോ ഒരിടത്ത് നിന്ന് മറ്റൊരിടത്തേക്ക് കൊണ്ടുപോകുന്നതാണ് ഇവിടെ നിരോധിച്ചത്.
വറോവ ചെള്ളുകളെ ഓസ്ട്രേലിയ തുടച്ചുനീക്കിയിരുന്നു. എന്നാൽ കഴിഞ്ഞയാഴ്ച സിഡ്നിക്കു സമീപം ഇവയുടെ സാന്നിധ്യം വീണ്ടും കണ്ടെത്തുകയായിരുന്നു. നൂറ് കിലോമീറ്റര് അകലെയുള്ള സ്ഥലങ്ങളില് വരെ ഇവയെത്തിയെന്ന് വ്യക്തമായി. ലോകമെങ്ങും തേനീച്ചക്കൃഷിക്ക് ഏറ്റവും വലിയ വെല്ലുവിളി സൃഷ്ടിക്കുന്നതാണ് വറോവ ഡിസ്ട്രക്ടറിന്റെ വ്യാപനം. ഇവയെ ഓസ്ട്രേലിയയില് വീണ്ടും കണ്ടെത്തിയതോടെ ആശങ്കയിലാണ് തേനീച്ച കര്ഷകര്.
ലക്ഷക്കണക്കിന് തേനീച്ചകളെയാണ് ലോക്ഡൗണിന് സമാനമായ നിയന്ത്രണങ്ങളില് പാര്പ്പിച്ചിരിക്കുന്നത്. ചെള്ളുകള് തേനീച്ചകളുടെ ശരീരത്തിൽ കയറിക്കൂടുകയും നീരൂറ്റിക്കുടിച്ച് അവയെ നശിപ്പിക്കുകയുമാണ് ചെയ്യുക. തേന് വിപണിയിലും ഭക്ഷ്യോൽപാദന രംഗത്തും വലിയ തിരിച്ചടിയുണ്ടാക്കുന്നതാണ് വറോവയുടെ വ്യാപനം.
English Summary: Australia honey bees put in lockdown due to deadly varroa parasite