ആന്ധ്ര തീരത്ത് 25 അടി നീളമുള്ള തിമിംഗലം; ജഡത്തിനു മുകളിൽകയറി ഫോട്ടോയെടുത്ത് ജനങ്ങള്‍–വിഡിയോ

ആന്ധ്രാപ്രദേശിലെ ശ്രീകാകുളത്ത് നീലത്തിമിംഗലം കരയ്ക്കടിഞ്ഞു. ഏകദേശം 25 അടി നീളവും 5 ടൺ ഭാരവുമുള്ള തിമിംഗലമാണ് മേഖവാരം ബീച്ച് തീരത്ത് അടിഞ്ഞത്. വിവരമറിഞ്ഞ് നിരവധി ആളുകൾ അവിടെ ഒഴുകിയെത്തി. തിമിംഗലത്തിന്റെ ജഡത്തിനു മുകളിൽ കയറുകയും സെൽഫിയെടുക്കുകയും ചെയ്തു. തിമിംഗലത്തിന്റെ വിഡിയോ സമൂഹമാധ്യമങ്ങൾ പ്രചരിച്ചുവരികയാണ്.

Read Also: മധ്യപ്രദേശിൽ 650 കോടി വർഷം പഴക്കമുള്ള ദിനോസർ മുട്ടകൾ കണ്ടെത്തി; ജനുവരിയിൽ കണ്ടെത്തിയതിൽ നിന്ന് വ്യത്യസ്തം

വ്യാഴാഴ്ചയാണ് തിമിംഗലം തീരത്തടിഞ്ഞത്. ബംഗാൾ ഉൾക്കടലിൽ ഇത്തരം തിമിംഗലങ്ങൾ അപൂർവമാണെന്നും കനത്തമഴയ്ക്കുപിന്നാലെ ആഴം കുറഞ്ഞ ഭാഗത്ത് എത്തി ചത്തൊടുങ്ങിയതാകാമെന്ന് മത്സ്യത്തൊഴിലാളികൾ പറയുന്നു. കഴിഞ്ഞ കുറച്ചുദിവസങ്ങളായി ഈ മേഖലയിൽ കനത്ത മഴ ഉണ്ടായിരുന്നു. പടിഞ്ഞാറൻ-മധ്യഭാഗത്തും വടക്കുപടിഞ്ഞാറൻ ബംഗാൾ ഉൾക്കടലിലും മണിക്കൂറിൽ 65 കിലോമീറ്റർ വരെ വേഗതയില്‍ കാറ്റ് വീശാൻ സാധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകരുതെന്ന് മുന്നറിയിപ്പ് നൽകിയിട്ടുണ്ട്.

English Summary: Blue whales washes ashore on Beach in Rain hit Andhra Pradesh