മരണം മുന്നിൽ കണ്ട് പകർത്തിയ ദൃശ്യം: 241 പേരുമായി അദ്ഭുത ലാൻഡിങ്: വിഡിയോ
Mail This Article
മരണം മുന്നിൽകണ്ട യാത്ര എന്നു പറയുന്നത് ഇതിനെയായിരിരിക്കും. തീപിടിച്ച എൻജിൻ കണ്ടുകൊണ്ട് യാത്ര ചെയ്യുന്ന ആ 231 യാത്രക്കാരുടെ മാനസികാവസ്ഥ എന്തായിരിക്കും?. യാത്രക്കാരിൽ ഒരാൾ ചിത്രീകരിച്ച വിഡിയോ അക്ഷരാർഥത്തിൽ പേടിപ്പിക്കുന്നതാണാ. ഇത് കണ്ടാൽ സംഭവത്തിന്റെ ഗൗരവം മനസിലാകും.
പറന്നുയർന്നതിനു പിന്നാലെ എൻജിന് തീപിടിച്ച യുണൈറ്റഡ് എയർലൈൻസിന്റെ ബോയിങ് 777–200 വിമാനത്തിൽ നിന്നുള്ള ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. തീപിടിച്ച എൻജിനുമായി വിമാനം ഡെൻവർ വിമാനത്താവളത്തിൽ സുരക്ഷിതമായി തിരിച്ചിറക്കി.
231 യാത്രക്കാരും 10 ജീവനക്കാരുമായി യുഎസിലെ ഡെൻവറിൽനിന്നു ഹൊണോലുലുവിലേക്ക് പറക്കുമ്പോൾ വിമാനത്തിന്റെ വലത്തെ എൻജിൻ തകരാറിലാവുകയായിരുന്നു. തുടർന്ന് ചിറകുകൾക്കു തീപിടിച്ചു. ഇതോടെ, യാത്രക്കാർ മാത്രമല്ല, ആകാശത്ത് സ്ഫോടനം കണ്ട നഗരവാസികളും പരിഭ്രാന്തരായി. എൻജിന്റെ ഏതാനും ഭാഗങ്ങൾ മൈതാനത്തും റോഡിലും പതിച്ചത് ആശങ്ക വർധിപ്പിച്ചു.
വീടിനു മുകളിൽ പതിക്കാതെ കഷ്ടിച്ചു രക്ഷപ്പെട്ട വിമാനം ഒരു ട്രക്കിനെ തവിടുപൊടിയാക്കി ഒടുവിൽ വിമാനത്താവളത്തിൽ തന്നെ ലാൻഡ് ചെയ്തു. യാത്രക്കാരെല്ലാം സുരക്ഷിതരാണെന്ന് അധികൃതർ അറിയിച്ചു. സ്ഫോടന ശബ്ദവും ആകാശത്തെ തീയും കിലോമീറ്ററുകളോളം ദൂരെനിന്നേ ശ്രദ്ധയിൽപെട്ടതായി നഗരവാസികൾ പറഞ്ഞു. എൻജിനെ പൊതിഞ്ഞുള്ള ഫൈബർ ഗ്ലാസ് കവചത്തിന്റെ ഭാഗങ്ങളാണ് താഴേക്കു പതിച്ചതെന്നും അവയിൽ നല്ലപങ്കും അന്തരീക്ഷത്തിൽ തന്നെ കത്തിച്ചാമ്പലായെന്നും അധികൃതർ വിശദീകരിച്ചു.