എല്ലാം സംഭവിച്ചത് 15 സെക്കൻഡിൽ, മരണപ്പാച്ചിലിനിടെ രക്ഷപ്പെട്ടത് ഭാഗ്യം: വിഡിയോ

വാഹനമോടിക്കുമ്പോൾ ഏറ്റവുമധികം വേണ്ടത് ക്ഷമയാണ്. റോഡ് മുറിച്ചു കടന്ന മറ്റു വാഹനങ്ങളോ, ആളുകളോ പോകുന്നുണ്ടെങ്കിൽ അവർ പോകുന്നതു വരെ ക്ഷമയോടെ കാത്തിരിക്കണം. എന്നാൽ ആ ക്ഷമ കാണിക്കാതെ വളയുന്ന വാഹനത്തിന്റെ ഇടയിലൂടെ കയറാൻ ശ്രമിക്കുന്നവരെ കാണാറുണ്ട്. അത്തരത്തിൽ തീരെ ക്ഷമയില്ലാത്തൊരു സ്കൂട്ടർ റൈഡറുടെ വിഡിയോയാണിത്.

കർണാടകയിലെ ദക്ഷിണ കന്നഡ ജില്ലയിലാണ് സംഭവം നടന്നത്. റോഡിനു കുറുകെ വളയ്ക്കാൻ ശ്രമിക്കുന്ന ബസിനിടിയിലൂടെ സ്കൂട്ടർ കയറ്റുകയാണ് ഈ യുവാവ് ചെയ്തത്. അമിതവേഗത്തിൽ എത്തിയ ആൾ വേഗം കുറയ്ക്കാതെ ബസിന് ഇടിയിലൂടെ മരത്തിനും മതിലിനും ഇടയിലൂടെ കയറ്റി നിർത്താതെ പോകുകയായിരുന്നു.

സ്കൂട്ടറിൽ വന്നയാൾ ഹെൽമെറ്റ് ധരിച്ചിരുന്നില്ല, ഇടയ്ക്ക് സ്കൂട്ടറിൽ വച്ചിരുന്ന ഹെൽമെറ്റ് തെറിച്ചു പോകുന്നതും വിഡിയോയിൽ കാണാം. ബസ് ഡ്രൈവർ പെട്ടെന്ന് ബ്രേക്ക് പിടിച്ചതുകൊണ്ട് മാത്രമാണ് സ്കൂട്ടർ റൈഡർ രക്ഷപ്പട്ടത്. എല്ലാം പെട്ടന്നായിരുന്നു എന്ന് വിഡിയോ കണ്ടാൽ മനസിലാകും ഏകദേശം 15 സെക്കൻഡിനുള്ളിൽ സംഭവം കഴിഞ്ഞു.

English Summary: Narrow escape for scooter rider in Karnataka