നെക്സോൺ ഇവി മാക്സ് സൂപ്പർഹിറ്റ്, ബുക്ക് ചെയ്ത് കാത്തിരിക്കേണ്ടത് നാലു മാസം വരെ
Mail This Article
കൂടുതൽ റേഞ്ചുമായി വിപണിയിലെത്തിയ നെക്സോൺ ഇവി മാക്സും സൂപ്പർഹിറ്റ് ചാർട്ടുകളിലേക്ക്. ബുക്ക് ചെയ്ത് വാഹനം ലഭിക്കാൻ നാലുമാസം വരെ കാത്തിരിക്കേണ്ടിവരുമെന്നാണ് റിപ്പോർട്ടുകൾ. (റേഞ്ച് കുറഞ്ഞ നെക്സോണിന്റെ കാത്തിരിപ്പ് പരിതി ആറുമാസം വരെയാണ്). ജൂൺ ആദ്യമുതൽ വാഹനത്തിന്റെ വിതരണം ആരംഭിക്കുമെന്നാണ് കമ്പനി അറിയിക്കുന്നത്. ഈ മാസം ആദ്യമാണ് ടാറ്റ നെക്സോൺ ഇവി മാക്സ് വിപണിയിലെത്തിച്ചത്. നെക്സോൺ ഇവി മാക്സ് ഇസഡ് എക്സ് പ്ലസ്, നെക്സോൺ ഇവി മാക്സ് ഇസഡ് എക്സ് പ്ലസ് ലക്സ് എന്നീ രണ്ടു മോഡലുകളിലായി ലഭിക്കുന്ന വാഹനത്തിന്റെ വില 17.74 ലക്ഷം രൂപ മുതലാണ്. ഒരു പ്രാവശ്യം ചാർജ് ചെയ്താൽ 437 കിലോമീറ്റർ സഞ്ചരിക്കുമെന്നു ടാറ്റ പറയുന്നു.
റേഞ്ച് കൂടിയ നെക്സോൺ, മാറ്റങ്ങൾ എന്തൊക്കെ?
നിലവിലെ ബാറ്ററിയെക്കാൾ 33 ശതമാനം വലിയ ബാറ്ററി പാക്കാണ് നെക്സോണ് ഇവി മാക്സിലുള്ളത്. നിലവിലെ ബാറ്ററിയെക്കാൾ 10 കിലോവാട്ട് അധികമുള്ള 40.5 കിലോവാട്ടാണ് പുതിയ ബാറ്ററി കപ്പാസിറ്റി. ബാറ്ററി പാക്ക് മാത്രമല്ല കരുത്ത് 14 എച്ച്പിയും ടോർക്ക് 5 എൻഎമ്മും ഉയർന്നു. 143 ബിഎച്ച്പിയും 250 എൻഎമ്മുമാണ് പുതിയ മാക്സിന്റെ കരുത്ത്. ബാറ്ററിയുടെ വലുപ്പം കൂട്ടിയത് ബൂട്ട് സ്പെയ്സ് കുറച്ചിട്ടില്ലെന്നും നെക്സോൺ ഇവിയുടെ 350 ലീറ്റർ തന്നെയാണ് മാക്സിനും ഉള്ളതെന്നും ടാറ്റ പറയുന്നു.
ഫാസ്റ്റ് ചാർജർ
രണ്ടു തരം ചാർജറുകൾ മാക്സിനൊപ്പം ടാറ്റ നൽകുന്നുണ്ട്. 3.3 കിലോവാട്ട് ചാർജർ സ്റ്റാൻഡേർഡായി ലഭിക്കും. 50000 രൂപ അധികം നൽകിയാൽ 7.2 കിലോവാട്ട് എസി ഫാസ്റ്റ് ചാർജറും ലഭിക്കും. 7.2 കിലോവാട്ട് എസി ചാർജർ ഉപയോഗിച്ചാൽ 6.5 മണിക്കൂറിൽ ബാറ്ററി പൂർണമായും ചാർജ് ചെയ്യാം എന്നാണ് കമ്പനി പറയുന്നത്. 50 കിലോവാട്ട് ചാർജറിൽ കണക്ട് ചെയ്താൽ 56 മിനിറ്റിൽ 80 ശതമാനം വരെ ചാർജ് ചെയ്യാം.
റീജനറേറ്റീവ് ബ്രേക്ക്
നെക്സോണിന്റെ പുതിയ പതിപ്പിൽ ഡ്രൈവർക്ക് റീജനറേറ്റീവ് ബ്രേക്കിങ്ങിന്റെ സാധ്യത ക്രമീകരിക്കാൻ കഴിയും വിധം റീ ജനറേഷൻ മോഡുകൾ തിരഞ്ഞെടുക്കാനാവും. നിലവിൽ നെക്സോണിൽ റീജനറേറ്റീവ് ബ്രേക്കിങ് ക്രമീകരിക്കാൻ അവസരമില്ല.
എതിരാളികൾ
ഹ്യുണ്ടേയ് കോന, എംജി സിഎസ് എന്നീ വാഹനങ്ങളുമായിട്ടാകും നെക്സോൺ ഇവി മാക്സ് മത്സരിക്കുക. 17.74 ലക്ഷം മുതൽ 19.24 ലക്ഷം രൂപ വരെയുള്ള വിലയും ഉയർന്ന റേഞ്ചും വിപണിൽ ശക്തമായ മത്സരം കാഴ്ചവയ്ക്കാൻ നെക്സോൺ മാക്സിനെ പ്രാപ്തമാക്കും എന്നാണ് വിലയിരുത്തൽ.
English Summary: Tata Nexon EV Max waiting period already at 4 months