2.8 കോടി രൂപയുടെ മയ്ബയിൽ തിളങ്ങി ദീപിക പദുക്കോൺ
Mail This Article
മെഴ്സിഡീസ് ബെൻസിന്റെ ഏറ്റവും ആഡംബരം നിറഞ്ഞ എസ്യുവി മയ്ബ ജിഎൽഎസ് 600 സ്വന്തമാക്കി ബോളിവുഡ് നടി ദീപിക പദുകോൺ. നേരത്തെ രൺവീർ സിങ്ങും മയ്ബ ജിഎൽഎസ് 600 വാങ്ങിയിരുന്നു. ബോളിവുഡ് താരങ്ങളുടെ ഇഷ്ടവാഹനമാണ് മയ്ബ ജിഎൽഎസ് 600. എക്സ്ഷോറൂം വില ഏകദേശം 2.8 കോടി രൂപ വരുന്ന ഈ ആഡംബര എസ്യുവി ആയുഷ്മാൻ ഖുറാന, അർജുൻ കപൂർ, കൃതി സിനോൺ, നിധിൻ റെഡ്ഡി, റാം ചരൺ തുടങ്ങിയ താരങ്ങളും അടുത്തിടെ സ്വന്തമാക്കിയിരുന്നു.
കഴിഞ്ഞ വർഷം ജൂണിലാണ് മയ്ബയുടെ ആദ്യ എസ്യുവി ഇന്ത്യൻ വിപണിയിലെത്തിയത്. ജിഎൽഎസിനെ അടിസ്ഥാനമാക്കി നിരവധി ആഡംബര മാറ്റങ്ങളോടെ നിർമിച്ച വാഹനമാണ് മയ്ബ ജിഎൽഎസ്600. എസ് ക്ലാസിന് ശേഷം ഇന്ത്യൻ വിപണിയിലെത്തുന്ന രണ്ടാമത്തെ മയ്ബ വാഹനമാണ് ജിഎൽഎസ്.
നാലു ലീറ്റർ ട്വീൻ ടർബൊ വി 8 എൻജിനും 48 വാട്ട് മൈൽഡ് ഹൈബ്രിഡ് സിസ്റ്റവുമാണ് വാഹനത്തിന് കരുത്തേകുന്നത്. എൻജിനിൽ നിന്ന് 557 എച്ച്പി കരുത്തും 730 എൻഎം ടോർക്കും ലഭിക്കുമ്പോൾ ഹൈബ്രിഡ് സിസ്റ്റത്തിന്റെ കരുത്ത് 22 എച്ച്പി, ടോർക്ക് 250 എൻഎം എന്നിങ്ങനെയാണ്. വാഹനത്തിൽ ഒമ്പത് സ്പീഡ് ഓട്ടമാറ്റിക് ഗിയർബോക്സാണുള്ളത്.
English Summary: Deepika Padukone Bought Mercedes Maybach GLS600 Worth 2.8 Crore