ലാൻഡ് റോവർ ഡിഫൻഡർ സ്വന്തമാക്കി കല്യാൺ ജ്വല്ലേഴ്സ് ഡയറക്ടർ സീതാറാം
![seetharam-land-rover-defender seetharam-land-rover-defender](https://img-mm.manoramaonline.com/content/dam/mm/mo/fasttrack/auto-news/images/2022/12/5/seetharam-land-rover-defender.jpg?w=1120&h=583)
Mail This Article
ലാൻഡ് റോവർ ഡിഫൻഡർ ഗാരിജിലെത്തിച്ച് കല്യാൺ ജ്വല്ലേഴ്സ് ഡയറക്ടർ സീതാറാം. കേരളത്തിലെ ജഗ്വാർ ലാൻഡ് റോവർ വിതരണക്കാരായ മുത്തൂറ്റ് ജെഎൽആറിൽ നിന്നാണ് ഡിഫൻഡറിന്റെ എച്ച്എസ്ഇ വകഭേദം സീതാറാം വാങ്ങിയത്. ഡിഫൻഡർ എച്ച്എസ്ഇ മോഡലിന് കരുത്തു പകരുന്നത് മൂന്നു ലീറ്റർ ഡീസൽ എൻജിനാണ്. 221 കിലോവാട്ട് കരുത്തുള്ള എസ്യുവി 100 കിലോമീറ്റർ വേഗത്തിൽ 7 സെക്കൻഡിലെത്തും. 191 കിലോമീറ്ററാണ് ഉയർന്ന വേഗം. ഏകദേശം 1.35 കോടി രൂപയാണ് വാഹനത്തിന്റെ എക്സ്ഷോറൂം വില.
എസ്യുവികളിലെ ഐതിഹാസിക മോഡൽ ഡിഫൻഡർ
ലാൻഡ് റോവറിന്റെ ഐതിഹാസിക മോഡലുകളിലൊന്നായിരുന്നു ഡിഫൻഡർ. ഡിഫൻഡറിന്റെ പുതിയ പതിപ്പ് 2020 ലാണ് രാജ്യാന്തര വിപണിയിൽ എത്തിയത്. പഴയ ഡിഫൻഡറിന്റെ സവിശേഷതകൾ നഷ്ടപ്പെടാതെയും ആധുനിക സൗകര്യങ്ങൾ കൂട്ടിയിണക്കിയുമെത്തിയ പുതിയ ഡിഫൻഡർ ഏറെ ആരാധകരെ സൃഷ്ടിച്ചു.
ഒറിജിനൽ ലാൻഡ് റോവർ സീരിസിൽ നിന്ന് വികസിപ്പിച്ച ഡിഫൻഡർ 1983 ലാണ് പുറത്തിറങ്ങുന്നത്. കുറഞ്ഞ ഫ്രണ്ട്, റിയർ ഓവർഹാങ് ആണു പുതിയ ഡിഫൻഡറിനും. ഇവ മികച്ച അപ്രോച്ച്, ഡിപ്പാർച്ചർ ആംഗിളുകൾ ലഭ്യമാക്കുകയും വാഹനത്തെ ഓഫ്റോഡിങ് സാഹചര്യങ്ങൾക്ക് തികച്ചും അനുയോജ്യമാക്കുകയും ചെയ്യുന്നു.
291 മി.മീ. ഗ്രൗണ്ട് ക്ലിയറൻസുണ്ട്. 900 മി.മീ. വരെ വെള്ളത്തിലൂടെ പോകാനുമാകും. 3 ലീറ്റർ ഡീസൽ എൻജിൻ മോഡൽ കൂടാതെ മൂന്നു ലീറ്റർ പെട്രോൾ എൻജിൻ മോഡലും വാഹനത്തിനുണ്ട്. 400 ബിഎച്ച്പി കരുത്ത് നൽകും ഈ എൻജിൻ. എട്ടു സ്പീഡ് ഓട്ടമാറ്റിക് ഗിയർബോക്സാണ്.
English Summary: Seetharam, Director Kalyan Jewellers Bought Land Rover Defender