മാരുതി ഫ്രോങ്സ് ഹൈബ്രിഡ്, 40 കി.മീ മൈലേജ്; അടുത്ത വർഷം വിപണിയിൽ

ഫ്രോങ്സിന്റെ ഹൈബ്രിഡ് പതിപ്പുമായി മാരുതി എത്തുന്നു. വിപണിയിലെത്താൻ ഒരുങ്ങുന്ന സ്വിഫ്റ്റിലുള്ള ഇസഡ് സീരിസ് എൻജിനിന്റെ ഹൈബ്രിഡ് മോഡലാണ് ഫ്രോങ്സിലും ഉപയോഗിക്കുക. ടൊയോട്ടയുടെ പാരലൽ ഹൈബ്രിഡിൽ നിന്ന് വ്യത്യസ്തമായി സീരിസ് ഹൈബ്രിഡ് സാങ്കേതിക വിദ്യയായിരിക്കും ഫ്രോങ്സിൽ. ഇന്ധനക്ഷമത കൂടിയ ഹൈബ്രിഡ് എൻജിൻ പുറത്തിറക്കി ഡീസൽ വിപണിയിൽ നിന്നുള്ള പിൻമാറ്റത്തിന്റെ ക്ഷീണം തീർക്കാനാകും എന്നാണ് മാരുതി കരുതുന്നത്. ‌‌ലീറ്ററിന് 35 മുതൽ 40 വരെ കിലോമീറ്റർ ഇന്ധനക്ഷമത ഈ എൻജിൻ നൽകുമെന്നാണ് കരുതുന്നത്.
 

അടുത്ത വർഷം ഹൈബ്രിഡ് ഫ്രോങ്സിനെ മാരുതി വിപണിയിലെത്തിക്കും. ഫ്രോങ്സിന് പിന്നാലെ ബലേനോ, സ്വിഫ്റ്റ് എന്നീ ജനപ്രിയ വാഹനങ്ങളുടേയും ഹൈബ്രിഡ് മോഡൽ പുറത്തിറക്കും. സാങ്കേതികവിദ്യക്കൊപ്പം മൈലേജിലും ഞെട്ടിക്കും വിപ്ലവം നടത്താനാണ് മാരുതി ശ്രമം. ഇലക്ട്രിക്കിൽ മാത്രം ഭാവി പദ്ധതികൾ ഒതുക്കാതെ സിഎൻജിയിലും ബയോ ഫ്യൂവലിലും ഹൈബ്രിഡിലുമെല്ലാം മാരുതി നിക്ഷേപങ്ങളിറക്കുന്നത് ഭാവിയിലെ വിപണി സാധ്യതകൾ മുന്നിൽ കണ്ടാണ്. ഗ്രാൻഡ് വിറ്റാരയെപ്പോലെയും ഇൻവിക്റ്റോയെപ്പോലെയും ടൊയോട്ടയിൽ നിന്ന് ഹൈബ്രിഡ് ടെക്നോളജി കടം കൊള്ളാതെ പുതിയ സാങ്കേതികവിദ്യ വികസിപ്പിക്കാനാണ് സുസുക്കി പദ്ധതി.
 

ഈ വർഷം സ്വിഫ്റ്റിലൂടെ അരങ്ങേറ്റം കുറിക്കുന്ന ഇസഡ് 12ഇ, മൂന്നു സിലിണ്ടർ എൻജിനിൽ 1.5–2 kWh ബാറ്ററി പായ്ക്കും ഇലക്ട്രിക് മോട്ടറും ചേർത്ത് ഇന്ധനക്ഷമത വർധിപ്പിക്കാനാണ് മാരുതിയുടെ ശ്രമം. ഫോങ്സ്, ബലേനോ, സ്പാസിയയെ അടിസ്ഥാനമാക്കിയ എംപിവി, സ്വിഫ്റ്റ് എന്നീ വാഹനങ്ങൾ ഈ എൻജിനുമായി വിപണിയിലെത്തും. ഡീസലിന് ബദലായി എത്തുന്ന ഈ ഉയർന്ന ഇന്ധനക്ഷമതയുള്ള കാറുകൾ ഇന്ത്യൻ വിപണിയിൽ ഒരു ഹൈബ്രിഡ് തരംഗം സൃഷ്ടിക്കുമെന്നാണ് മാരുതിയുടെ പ്രതീക്ഷ.