ഇലക്ട്രിക് വാഹനങ്ങൾ പ്രകൃതിക്കു ദോഷമുണ്ടാക്കില്ലേ? ഇല്ലെന്നാണു നമ്മുടെ പറച്ചിൽ. പക്ഷേ അവയും മലിനീകരണം ഉണ്ടാക്കുന്നുണ്ട്. അതു നമ്മൾ കാണുന്നതു പോലെ പുക രൂപത്തിൽ പുറത്തേക്കു വരുന്നില്ല എന്നു മാത്രം. ചില സ്ഥലങ്ങളിലാകട്ടെ, പെട്രോളിയം ഇന്ധനത്തിൽ ഓടുന്ന വാഹനങ്ങളേക്കാൾ കൂടിയ മലിനീകരണമാണു വൈദ്യുത വാഹനങ്ങൾ സൃഷ്ടിക്കുന്നത്. കാലാവസ്ഥാ വ്യതിയാനത്തെ പിടിച്ചു നിർത്താനും ആഗോള താപനം കുറയ്ക്കാനുമായി ലോകരാജ്യങ്ങൾ പൊതുവായി സ്വീകരിക്കുന്ന മാർഗമാണു ഫോസിൽ ഇന്ധനങ്ങൾ ഉപയോഗിക്കുന്നതിനു പകരം വൈദ്യുത വാഹനങ്ങളെ പ്രോൽസാഹിപ്പിക്കുക എന്നത്.
