യുകെയിലെ കെന്റിൽ പെണ്കുട്ടിയെ കുത്തി പരുക്കേല്പ്പിച്ച സംഭവം; 12 വയസ്സുകാരൻ അറസ്റ്റില്
![Handcuff (Representative Image by Scott Olson/Getty Images/AFP)](https://img-mm.manoramaonline.com/content/dam/mm/mo/premium/opinion-and-analysis/images/2023/8/16/handcuff.jpg?w=1120&h=583)
Mail This Article
കെന്റ്/ലണ്ടൻ ∙ യുകെയിലെ കെന്റില് കൗമാരക്കാരിയായ പെണ്കുട്ടിയെ കത്തിക്ക് കുത്തി പരുക്കേൽപ്പിച്ച സംഭവത്തില് 12 വയസ്സുള്ള ആണ്കുട്ടിയെ അറസ്റ്റ് ചെയ്തു. വെളളിയാഴ്ച ഉച്ചകഴിഞ്ഞ് 3.55 ന് സിറ്റിങ്ബണിലെ അഡ്ലെയ്ഡ് ഡ്രൈവിലുള്ള പെണ്കുട്ടിക്ക് കുത്തേറ്റതായി റിപ്പോര്ട്ടുകള് വന്നതിനെത്തുടര്ന്നാണ് ഉദ്യോഗസ്ഥരെയും പാരാമെഡിക്കൽ സംഘത്തെയും വിളിച്ചുവരുത്തിയതെന്ന് കെന്റ് പൊലീസ് അറിയിച്ചു. മുറിവേറ്റ പെണ്കുട്ടിയെ കണ്ടെത്തിയതിനെ തുടർന്ന് ലണ്ടനിലെ ആശുപത്രിയില് എത്തിച്ചു.
പെണ്കുട്ടിയുടെ പരുക്ക് ഗുരുതരമല്ലെന്നും ആരോഗ്യസ്ഥിതി തൃപ്തികരമാണെന്നും പൊലീസ് പറഞ്ഞു. ഗുരുതരമായ ദേഹോപദ്രവം ഏല്പ്പിക്കുക എന്ന ഉദ്ദേശത്തോടെ പെൺകുട്ടിയെ മുറിവേല്പ്പിച്ച കൗമാരക്കാരന് കസ്റ്റഡിയിലാണ്. സംഭവസ്ഥലത്ത് നിന്നുള്ള എന്തെങ്കിലും വിവരമോ സിസിടിവി ദൃശ്യമോ ലഭിച്ചവർ പൊലീസ് അധികൃതരുമായി ബന്ധപ്പെടണമെന്ന് കെന്റ് പൊലീസ് അഭ്യര്ഥിച്ചു.