റിയാദ് ∙ മറൂഫ് പ്ലാറ്റ്‌ഫോമിന് പകരം ഇ-സ്റ്റോറുകൾ ബിസിനസ് പ്ലാറ്റ്‌ഫോം വഴി റജിസ്റ്റർ ചെയ്യണമെന്ന് സൗദി വാണിജ്യ മന്ത്രാലയം ഇലക്ട്രോണിക് സ്റ്റോറുകളോട് ആവശ്യപ്പെട്ടു.
ഡോക്യുമെന്റേഷൻ നടപടിക്രമങ്ങൾ വികസിപ്പിച്ചതിന്റെ ഫലമായി ഇ-കൊമേഴ്‌സ് കൗൺസിലുമായി സംയോജിപ്പിച്ചാണ് സൗദി ബിസിനസ് സെന്ററുമായി (എസ്‌ബിസി) അഫിലിയേറ്റ് ചെയ്‌തിരിക്കുന്ന ബിസിനസ് പ്ലാറ്റ്‌ഫോം വഴി ഇ-സ്റ്റോറുകൾ റജിസ്റ്റർ ചെയ്യാനുള്ള തീരുമാനമെന്ന് മന്ത്രാലയം അറിയിച്ചു. കൂടാതെ, അതിന്റെ സാമ്പത്തിക ഇടപാടുകളുടെ വിശ്വാസ്യത ശക്തിപ്പെടുത്തുന്നതിനും വഞ്ചനപരമായവ ഒഴിവാക്കുന്നതിനുമായി സ്റ്റോറിനായി ഒരു വാണിജ്യ ബാങ്ക് അക്കൗണ്ടും ആവശ്യമാണ്.
റജിസ്ട്രേഷൻ നടപടിക്രമങ്ങൾ വളരെ ലളിതമാണെന്നും https://business.sa/ വഴി ഓൺലൈനായി നടത്താമെന്നും മന്ത്രാലയം വ്യക്തമാക്കി. തങ്ങളുടെ സ്റ്റോറുകൾ രേഖപ്പെടുത്താൻ ആഗ്രഹിക്കുന്നവർക്ക് ഒരു വാണിജ്യ റജിസ്റ്റർ, അല്ലെങ്കിൽ സാധുവായ ഒരു ഫ്രീലാൻസ് സർട്ടിഫിക്കറ്റ്, അതുപോലെ ഒരു ബാങ്ക് അക്കൗണ്ട് എന്നിവ ഉണ്ടായിരിക്കണമെന്നും അറിയിച്ചു.
