സഹകരണം ശക്തിപ്പെടുത്താൻ ഖത്തർ അമീർ –ഋഷി സുനക് കൂടിക്കാഴ്ച
Mail This Article
ദോഹ∙ അമീർ ഷെയ്ഖ് തമീം ബിൻ ഹമദ് അൽതാനിയും യുകെ പ്രധാനമന്ത്രി ഋഷി സുനകും കൂടിക്കാഴ്ച നടത്തി. ലണ്ടനിലെ 10 ഡൗണിങ് സ്ട്രീറ്റിലെ പ്രധാനമന്ത്രിയുടെ ആസ്ഥാന മന്ദിരത്തിൽ നടന്ന കൂടിക്കാഴ്ചയിൽ ഖത്തറുമായുള്ള സഹകരണം ശക്തിപ്പെടുത്തുന്നതും മേഖലയിലെയും രാജ്യാന്തര തലത്തിലെയും പുരോഗതികളും ഇരുവരും ചർച്ച ചെയ്തു.
Also read: ബിഗ് ടിക്കറ്റ് വാരാന്ത്യ നറുക്കെടുപ്പ്: 3 ഇന്ത്യക്കാർ ഉൾപ്പെടെ 4 പേർക്ക് ലക്ഷം ദിർഹം
ഇരു രാജ്യങ്ങളും തമ്മിലുള്ള പ്രത്യേകിച്ചും മേഖലാ സുരക്ഷയിലും പ്രതിരോധ മേഖലയിലുമുള്ള സഹകരണവും ചർച്ചയായി. കഴിഞ്ഞ വർഷം ഖത്തർ ആതിഥേയത്വം വഹിച്ച ഫിഫ ലോകകപ്പിൽ യുകെ സർക്കാർ നൽകിയ പിന്തുണയ്ക്ക് അമീർ നന്ദി അറിയിച്ചു. ഈ വർഷം തന്നെ യുകെയും ഖത്തറും തമ്മിലുള്ള സ്ട്രാറ്റജിക് ചർച്ച നടക്കും.
സുരക്ഷ, ഊർജം, സാമ്പത്തികം തുടങ്ങിയ മേഖലകളിലെ പങ്കാളിത്തമായിരിക്കും ചർച്ച ചെയ്യുക. അമീരി ദിവാൻ ചീഫ് ഷെയ്ഖ് സൗദ് ബിൻ അബ്ദുൽ റഹ്മാൻ അൽതാനി, യുകെയിലെ ഖത്തർ സ്ഥാനപതി ഫഹദ് ബിൻ മുഹമ്മദ് അൽ അത്തിയ്യ എന്നിവരും കൂടിക്കാഴ്ചയിൽ പങ്കെടുത്തു.