റാസൽഖോർ റോഡ് വീതി കൂട്ടൽ പദ്ധതി പൂർത്തിയായി
Mail This Article
ദുബായ് ∙ റാസൽഖോർ റോഡ് വീതി കൂട്ടൽ പദ്ധതി പൂർത്തിയായി. ഇതു പ്രകാരം 3 കിലോമീറ്റർ ഇരുദിശകളിലേയ്ക്കും വ്യാപിപ്പിച്ച് 3 മുതൽ 4 വരി പാതയായി വർധിപ്പിച്ചതായി റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) അറിയിച്ചു. റോഡ് വിപുലീകരണ പ്രവർത്തനങ്ങൾ ബു ഖദ്റ ഇൻറർസെക്ഷൻ മുത അൽ ഖൈൽ റോഡ് ഇൻറർസെക്ഷൻ വരെ നീളുന്നു.
ദുബായ്-അൽ ഐൻ റോഡിന്റെ ദിശയിലുള്ള റാസൽഖോർ റോഡിലെ തിരിവുകൾക്കായി ആർടിഎ കളക്ടർ റോഡുകൾ ഏപ്രിൽ മാസത്തോടെ ഒന്ന് മുതൽ രണ്ട് വരെ വരിയായി വികസിപ്പിക്കും. പ്രത്യേകിച്ച് ദ്രുതഗതിയിലുള്ള നഗരവൽക്കരണവും ജനസംഖ്യാ വളർച്ചയും അനുഭവിക്കുന്ന പ്രദേശങ്ങളിൽ ദുബായുടെ അടിസ്ഥാന സൗകര്യങ്ങൾ നവീകരിക്കുന്നതിനുള്ള ആർടിഎയുടെ ശ്രമങ്ങളുടെ ഭാഗമാണ് ഈ പദ്ധതി.
ഏകദേശം 6,50,000 നിവാസികൾ താമസിക്കുന്ന ഒട്ടേറെ റെസിഡൻഷ്യൽ, വ്യാവസായിക ഡിസ്ട്രിക്ടുകളിലേയ്ക്ക് സേവനം നൽകുന്ന ഒരു നിർണായക പാതയാണ് റാസൽഖോർ റോഡ്. നടന്നുകൊണ്ടിരിക്കുന്ന നിരവധി വികസന പദ്ധതികൾക്ക് പുറമേ ദുബായ്-അൽ ഐൻ റോഡിലേയ്ക്കുള്ള ബൈപാസ് പാതയുടെ നവീകരണം ഇരട്ടിയാക്കാനും ആർടിഎ ഉദ്ദേശിക്കുന്നു. മണിക്കൂറിൽ 1,000 മുതൽ 2,000 വരെ വാഹനങ്ങളുടെ ശേഷിയോടെ വാഹനത്തിൻ്റെ ഒഴുക്ക് 100 ശതമാനം വർധിപ്പിക്കും.