ഇറാൻ പ്രസിഡന്‍റിന്‍റെ വിയോഗത്തിൽ അനുശോചിച്ച് സൗദി

റിയാദ് ∙ ഹെലികോപ്ടർ അപകടത്തിൽ അന്തരിച്ച ഇറാൻ പ്രസിഡന്‍റിന്‍റെയും ഒപ്പമുമുണ്ടായിരുന്നവരുടേയും വിയോഗത്തിൽ സൗദി ഭരണാധികാരി സൽമാൻ രാജാവും കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ രാജകുമാരനും അനുശോചനം രേഖപ്പെടുത്തി. നേരത്തെ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ, വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അൽ മക്തൂം, ഖത്തർ ഭരണാധികാരി ഷെയ്ഖ് തമിം ബിൻ ഹമദ് അൽ താനി എന്നിവര്‍ അനുശോചന സന്ദേശമയച്ചിരുന്നു. ഇറാനോട് ഐക്യദാർഢ്യവും പ്രഖ്യാപിച്ചു. ഇറാനിലെ യുഎഇ സ്ഥാനപതി സെയ്ഫ് മുഹമ്മദ് അൽ സഅബിയും അനുശോചിച്ചു.

ഇബ്രാഹിം റഈസിയും സംഘവും സഞ്ചരിച്ച ഹെലികോപ്റ്റർ പൂർണമായും കത്തിനശിച്ച നിലയിൽ കണ്ടെത്തിയതിനു പിന്നാലെയാണ് പ്രസിഡന്റ് ഉൾപ്പെടെ ഹെലികോപ്റ്ററിലുണ്ടായിരുന്ന ഒൻപതു യാത്രക്കാരും മരിച്ചതായി സ്ഥിരീകരണം വന്നത്. ഇറാൻ വിദേശകാര്യ മന്ത്രി അമീർ അബ്ദുല്ലാഹിയാനും കൊല്ലപ്പെട്ടവരുടെ കൂട്ടത്തിലുണ്ട്.