പകര്‍ച്ചപ്പനികളുടെ പൊതുസ്വഭാവങ്ങള്‍

മഴക്കാലത്ത് കൂടുതലായി ഉണ്ടാവുന്ന സാംക്രമികരോഗങ്ങളില്‍ വിവിധ പകര്‍ച്ചപ്പനികളൊയ ഡെങ്കൂഫീവര്‍, മലേറിയ, എലിപ്പനി തുടങ്ങിയവയാണ് പലപ്പോഴും അപകടകാരികളാവുന്നത്. പകര്‍ച്ചപ്പനികള്‍ക്ക് പൊതുവായ ചില  സ്വാഭാവങ്ങളുണ്ട്. അവയെപ്പറ്റി അറിഞ്ഞിരിക്കുന്നത് രോഗത്തെ ആരംഭത്തില്‍ തന്നെ കണ്ടെത്തുന്നതിനും പ്രതിരോധത്തിനും സഹായിക്കും.

∙ ഏതു കാലാവസ്ഥയിലും അതായത് മഴയെത്തും മുമ്പും പകര്‍ച്ചപ്പനികള്‍ നമ്മുടെ നാട്ടില്‍ ഉണ്ടാവാറുണ്ടെങ്കിലും ഡെങ്കിപ്പനിപോലുള്ള കൊതുകുജന്യരോഗങ്ങള്‍ മഴക്കാലത്താണ് കൂടുതല്‍ ഉണ്ടാവുന്നത്. ഇതിനു കാരണം രോഗാണുവിനും രോഗാണുവാഹകരായ കൊതുകകള്‍ക്കും വംശവര്‍ധനവിന് സഹായിക്കുന്ന സാഹചര്യമാണ് മഴക്കാലത്ത് ഉള്ളതെന്നാണ്.

∙ ഒരോ പനിയും ഉണ്ടാക്കുന്നത് ഒരോതരം രോഗാണുക്കളാണ്. ചിലവ വൈറസും മറ്റു ചിലവ ബാക്ടീരിയകളും. അവ ശരീരത്തില്‍ പ്രവേശിക്കുമ്പോഴാണ് പനികള്‍ ഉണ്ടാവുന്നത്.

∙ പരിസ്ഥിതി മലിനീകരണമാണ് പകര്‍ച്ചപ്പനികള്‍ പടര്‍ന്നു പിടിക്കാനുള്ള പ്രധാന കാരണം. മലീമസമായ പരിസ്ഥിതിയില്‍ രോഗാണുക്കള്‍ ധാരാളമായി ഉണ്ടാവുന്നു.

∙ ശക്തമായ പനിയും ശരീര വേദനയുമാണ് പ്രാരംഭലക്ഷണങ്ങള്‍. രോഗാണു ശരീരത്തില്‍ പ്രവേശിച്ച് കുറച്ചു ദിവസങ്ങള്‍ക്ക്  (Incubation Period) ശേഷമായിരിക്കും പനി ആരംഭിക്കുക. ഉദാ : മലേറിയയുടെ Incubation Period 10 ദിവസമാണ്.

∙ ആരംഭത്തില്‍തന്നെ പനിയെ തിരിച്ചറിഞ്ഞ് വേണ്ട ചികിത്സ നല്‍കിയില്ലെങ്കില്‍ രോഗം ഗുരുതരമാകാനും മരണം സംഭവിക്കാനും സാധ്യതയുണ്ട്.

∙ പനി ഏതാണെന്ന് കണ്ടെത്താന്‍ രക്തപരിശോധനകള്‍ ആവശ്യമാണ്.

∙ രോഗത്തിന്‍റെ തീവ്രത പലരിലും വ്യത്യാസപ്പെട്ടിരിക്കും. എത്രമാത്രം രോഗാണുക്കള്‍ ശരീരത്തില്‍ പ്രവേശിച്ചെന്നതിന്‍റെയും ആ വ്യക്തിയുടെ പ്രകൃതിദത്ത രോഗപ്രതിരോധശക്തിയും അനുസരിച്ചാണിത്.

∙ രോഗത്തിന്‍റെ സങ്കീര്‍ണതകള്‍ ഉണ്ടാവുന്നതാണ് പലപ്പോഴും മരണത്തിനു കാരണമാവുന്നത്.

∙ എല്ലാ പനികള്‍ക്കും ശരിയായ ചികിത്സയും വിശ്രമവും ആവശ്യമാണ്.

(മെഡിക്കൽ ഗ്രന്ഥകാരനും പൊതുജനാരോഗ്യ പ്രവർത്തകനുമായ ലേഖകൻ പൊൻകുന്നം ശാന്തിനികേതന്‍ ആശുപത്രിയിൽ സേവനം അനുഷ്ഠിക്കുന്നു)