വൃക്കയിലെ കാൻസർ: ഈ ലക്ഷണങ്ങൾ ശ്രദ്ധിക്കുക
Mail This Article
റീനൽ സെൽ കാർസിനോമ എന്ന വൃക്കയിലെ കാൻസർ ഇപ്പോൾ കൂടുതലായി കണ്ടുവരുന്ന ഒന്നാണ്. 50 വയസ്സിനു മുകളിൽ പ്രായമുള്ളവരിലാണ് ഇത് കൂടുതലായി കാണുന്നത്. കുടുംബ പാരമ്പര്യം, രക്താതിസമ്മർദം, പോളിസിസ്റ്റിക് കിഡ്നി, പൊണ്ണത്തടി, ചില മരുന്നുകളുടെ ദീർഘകാല ഉപയോഗം മൂലമുള്ള പാർശ്വഫലങ്ങൾ എന്നിങ്ങനെ ഒട്ടേറെ കാരണങ്ങൾ ഈ രോഗത്തിലേക്കു നയിക്കാം.
രക്ത പരിശോധന, മൂത്ര പരിശോധന, ബയോപ്സി, എക്സ് റേ, സിടി സ്കാൻ, അൾട്രാസൗണ്ട്, എംആർഐ സ്കാൻ എന്നിവയാണ് പ്രധാന രോഗപരിശോധനകൾ.
ഒരു ഭാഗത്തു മാത്രം കാണുന്ന നടുവേദന, ക്ഷീണം, വിശപ്പില്ലായ്മ, മൂത്രത്തിൽ രക്തത്തിന്റെ അംശം, ചില സമയങ്ങളിൽ തൊട്ടു നോക്കുമ്പോൾ മുഴ പോലെ അനുഭവപ്പെടുക, ശരീരഭാരം കുറയൽ, വിളർച്ച എന്നിവയാണ് വൃക്കയിലെ കാൻസറിന്റെ പ്രധാന ലക്ഷണങ്ങൾ.
രോഗം സ്ഥിരീകരിച്ചു കഴിഞ്ഞാൽ ട്യൂമർ മാത്രമായോ ട്യൂമർ ബാധിച്ച വൃക്ക മുഴുവനായോ ശസ്ത്രക്രിയയിലൂടെ നീക്കം ചെയ്യും. ഇതു കൂടാതെ റേഡിയേഷൻ, കീമോതെറപ്പി ഉൾപ്പടെയുള്ള ചികിത്സകളും ചെയ്യേണ്ടതാണ്.
ലക്ഷണങ്ങൾ കാണുമ്പോൾതന്നെ സ്വയം ചികിത്സയ്ക്കു മുതിരാതെ വിദഗ്ധോപദേശം സ്വീകരിച്ച് രോഗം ഏതാണെന്നു സ്ഥിരീകരിക്കുകയാണ് ആദ്യം വേണ്ടത്.
English Summary : Kidney cancer symptoms and treatment