അവിശ്വസനീയം; വെറും 5 സെന്റിൽ ഇങ്ങനെ ഒരു വീട് പണിതെന്നോ!
Mail This Article
നഗരപ്രദേശങ്ങളിൽ ലഭ്യമായ ചെറിയ പ്ലോട്ടുകളിൽ വീട് പണിയുക ഒരു വെല്ലുവിളി തന്നെയാണ്. എന്നാൽ അത്തരം സ്ഥലപരിമിതികളെ അപ്രസക്തമാക്കി നിർമിച്ചതാണ് കോഴിക്കോട് കല്ലായിയിലുള്ള ഷുമൈസിന്റെ വീട്.
L ഷേപ്പിലുള്ള 6 സെന്റ് പ്ലോട്ട്. ചുറ്റുപാടും വീടുകൾ. വീട്ടിലേക്കുള്ള വഴി തന്നെ ഒന്നേകാൽ സെന്റോളമുണ്ട്. നിയമപ്രകാരമുള്ള സെറ്റ്ബാക്ക് ഒഴിച്ചിട്ടാൽ വീടുപണിയാൻ ബാക്കിയുള്ളത് 5 സെന്റ് മാത്രം. അവിടെയാണ് ഇത്രയും സൗകര്യങ്ങളുള്ള വീട് പണിതിരിക്കുന്നത്.
പ്ലോട്ടിന്റെ പരിമിതികൾ ഉള്ളിൽ കയറിയാൽ മറക്കണം എന്നതായിരുന്നു വീട്ടുകാരുടെ ഡിമാൻഡ്. ഇടുങ്ങിയ പ്ലോട്ടിൽ കാറ്റും വെളിച്ചവും മുടങ്ങാതിരിക്കാൻ ധാരാളം ജാലകങ്ങൾ സ്ട്രക്ചറിൽ ഉൾപ്പെടുത്തി. ബോക്സ്- പ്ലെയിൻ രീതിയിലാണ് എലിവേഷൻ.
പോർച്ച്, ചെറിയ സിറ്റൗട്ട്, ലിവിങ്, ഡൈനിങ്, കിച്ചൻ, വർക്കേരിയ, രണ്ടു കിടപ്പുമുറികൾ എന്നിവ താഴത്തെ നിലയിൽ ക്രമീകരിച്ചു. മുകൾനിലയിൽ രണ്ടു കിടപ്പുമുറികൾ, ലിവിങ്, സ്റ്റഡി സ്പേസ് എന്നിവയും ഒരുക്കി. സെക്കൻഡ് ഫ്ലോറിലെ ഓപ്പൺ ടെറസിൽ ഗാർഡനും സജ്ജീകരിച്ചു. മൊത്തം 2950 ചതുരശ്രയടിയാണ് വിസ്തീർണം.
തുറന്ന നയത്തിലാണ് അകത്തളങ്ങൾ നിർമിച്ചത്. ഇടങ്ങൾ തമ്മിൽ ജിഐ ഷെൽഫുകൾ കൊണ്ട് പാർടീഷൻ ഒരുക്കി. ഫോർമൽ ലിവിങ്ങിൽ നിന്നും സ്ലൈഡിങ് ഗ്ലാസ് ഡോർ വഴി ചുറ്റുമതിലിനോട് ചേർത്തൊരുക്കിയ കോർട്യാർഡിലേക്കിറങ്ങാം. ഇതിനു പർഗോള സീലിങ് ചെയ്ത് താഴെ സീറ്റിങ്ങും കൊടുത്തു.
ഫർണിച്ചറുകൾ എല്ലാം ഇറക്കുമതി ചെയ്തവയാണ്. ലൈറ്റുകൾ കസ്റ്റമൈസ് ചെയ്തു. ഉള്ളിൽ ഫോൾസ് സീലിങ് കൊടുത്തിട്ടില്ല എന്നത് ശ്രദ്ധേയമാണ്. മഗ്രാന വൈറ്റ് മാർബിളാണ് നിലത്തുവിരിച്ചത്. വുഡൻ ഫിനിഷിലാണ് സ്റ്റെയർകേസ്.
നീളൻ ഹാളിന്റെ മധ്യത്തിലായി ഡൈനിങ് ടേബിൾ കൊടുത്തു. ഹാളിന്റെ ഒരറ്റത്തെ ഭിത്തി ഹൈലൈറ്റ് ചെയ്ത് മിനി സീറ്റിങ് ഏരിയയും സജ്ജീകരിച്ചു.
അക്രിലിക് ഫിനിഷിലാണ് കിച്ചൻ കബോർഡുകൾ. ഗാലക്സി ബ്ലാക് ഗ്രാനൈറ്റാണ് കൗണ്ടറിൽ വിരിച്ചത്. കിച്ചനിൽ നിന്നും ഡൈനിങ്ങിലേക്ക് തുറക്കുന്ന ഒരു പാൻട്രി കൗണ്ടറുമുണ്ട്.
കിടപ്പുമുറികളിൽ കോൺട്രാസ്റ്റ് കളർ സീലിങ് കൊടുത്തു. ഇരിപ്പിട സൗകര്യങ്ങളുള്ള ജനാലകളാണ് മുറികളിൽ. കിടപ്പുമുറികളിൽ സ്റ്റോറേജിന് പ്രാധാന്യം കൊടുത്തു. ഇതിനായി കൺസീൽഡ് വോക്-ഇൻ വാഡ്രോബുകൾ കൊടുത്തു. എല്ലാ മുറികൾക്കും അറ്റാച്ഡ് ബാത്റൂമും കൊടുത്തു. ഇതിൽ ഡ്രൈ- വെറ്റ് ഏരിയകൾ വേർതിരിച്ചു.
ചുരുക്കത്തിൽ ഒരിഞ്ചുപോലും നഷ്ടമാകാതെ ഉപയുക്തമാക്കിയതാണ് ഈ വീടിന്റെ വിജയം. വീട്ടുകാർ ആഗ്രഹിച്ചതുപോലെ, അതിഥികൾ വരുമ്പോൾ നീളൻ മുറ്റത്ത് നാലഞ്ചു കാറുകൾ പാർക്ക് ചെയ്യാം. അകത്തേക്ക് കയറിയാൽ 5 സെന്റിലെ വീടാണെന്ന് ഒരിക്കലും അനുഭവപ്പെടുകയുമില്ല..
Project facts
Location- Kallai, Calicut
Plot- 6 cent
Area-2950 SFT
Owner- Shumaiz
Construction- Althaf
Architect- Faheem Moosa
Design Core
Mob- 9037272830
Y.C- 2020 Dec
ചിത്രങ്ങൾ- അജീബ് കോമാച്ചി
English Summary- Small Plot House Plan Calicut; Veedu Malayalam Magazine