വേനൽക്കാലമായതോടെ ഗൃഹോപകരണങ്ങളുടെ ഉപയോഗവും വർധിച്ചു. ഫലമോ ഷോക്കടിപ്പിക്കുന്ന വൈദ്യുതി ബില്ലും! ഗൃഹോപകരണങ്ങൾ ശരിയായ വിധത്തിൽ ഉപയോഗിച്ചാൽ വൈദ്യുതി ലാഭിക്കാനാകും. ഇതിനായി അറിയേണ്ട ചില കാര്യങ്ങൾ...

1. റഫ്രിജറേറ്റർ

∙ആവശ്യത്തിനു മാത്രം വലിപ്പമുള്ളതും ഊർജകാര്യക്ഷമത കൂടിയതുമായ മോഡലുകൾ തെരഞ്ഞെടുക്കുക. 

∙ഇൻവെർട്ടർ റഫ്രിജറേറ്റർ കാര്യക്ഷമതയിൽ മുന്നിൽ.

∙റഫ്രിജറേറ്ററിനു ചുറ്റും വായുസഞ്ചാരം ഉറപ്പാക്കുന്നതിനായി ഭിത്തിയിൽ നിന്നും 15 cm അകലം പാലിക്കണം. 

∙കൂടെ  കൂടെ റഫ്രിജറേറ്റർ തുറക്കുന്നത് ഊർജനഷ്ടം ഉണ്ടാക്കും. 

∙ആഹാരപദാർഥങ്ങൾ ചൂടാറിയതിനുശേഷം മാത്രം റഫ്രിജറേറ്ററിൽ വയ്ക്കുക.

∙ആഹാരസാധനങ്ങൾ അടച്ചുമാത്രം റഫ്രിജറേറ്ററിൽ സൂക്ഷിക്കുക. ഇത് ഈർപ്പം റഫ്രിജറേറ്ററിനകത്ത് വ്യാപിക്കുന്നത് തടയുകയും, തൻമൂലം ലോഡ് കൂടുകയും ഇതുവഴി വൈദ്യുതി നഷ്ടം ഉണ്ടാകുന്നത് ഒഴിവാക്കുകയും ചെയ്യുന്നു. 

∙റഫ്രിജറേറ്ററിന്റെ വാതിൽ ഭദ്രമായി അടഞ്ഞിരിക്കണം. ബീഡിങ്ങിലൂടെയുള്ള തണുത്ത വായുവിന്റെ ലീക്ക് ഇടയ്ക്ക് പരിശോധിക്കണം. 

∙ഫ്രീസറിൽ ഐസ് കൂടുതൽ കട്ട പിടിക്കുന്നത് ഊർജനഷ്ടം ഉണ്ടാക്കുന്നു. 

∙ഫ്രീസറിൽ നിന്ന് എടുക്കുന്ന സാധനങ്ങൾ അൽപനേരം ഫ്രിഡ്ജിന്റെ താഴത്തെ തട്ടിൽ വച്ചാൽ നന്ന്. 

2. ഇസ്തിരിപ്പെട്ടി

∙ഓട്ടോമാറ്റിക് ഇസ്തിരിപ്പെട്ടികൾ കാര്യക്ഷമത കൂടിയവാണ്. ഇവ ഈ സംവിധാനം ഇല്ലാത്തതിനേക്കാൾ പകുതി വൈദ്യുതി മാത്രം ഉപയോഗിക്കുന്നു. 

∙ഇസ്തിപ്പെട്ടി ഉപയോഗിക്കുന്ന സ്ഥലത്ത് കഴിവതും ഫാനിന്റെ ഉപയോഗം ഇല്ലെന്ന് ഉറപ്പുവരുത്തുക വഴി ഇസ്തിരിപ്പെട്ടിയിൽ നിന്നും ചൂട് നഷ്ടപ്പെടുന്നത് ഒഴിവാക്കാം. 

∙ഒരാഴ്ചത്തേക്ക് വേണ്ട വസ്ത്രങ്ങൾ ഒരുമിച്ച് ഇസ്തിരിയിടുന്നത് ശീലമാക്കുക. 

∙അലക്കിയ വസ്ത്രങ്ങൾ പിഴിയാതെ ഉണക്കിയെടുക്കാൻ പറ്റുകയാണെങ്കിൽ ഇസ്തിരിപ്പെട്ടിയുടെ ഉപയോഗം കുറയ്ക്കാം. 

3. ടെലിവിഷൻ

∙സി. ആർ. റ്റി  ടെലിവിഷനുകളെ അപേക്ഷിച്ച് എൽ. ഇ. ഡി/ എൽ. സി. ഡി ടെലിവിഷനുകൾ കുറഞ്ഞ വൈദ്യുതി ഉപയോഗിച്ച് പ്രവർത്തിക്കുന്നു. 

∙ടെലിവിഷൻ റിമോട്ടിൽ മാത്രം ഓഫാക്കി ഇടുന്നത് വൈദ്യുതി നഷ്ടത്തിന് ഇടയാക്കും. അതിനാല്‍ സ്വിച്ച് ഓഫാക്കുക. 

∙ആവശ്യത്തിന് മാത്രം വലിപ്പമുള്ള സ്ക്രീൻ തെരഞ്ഞെടുക്കുക. വലിപ്പം കൂടുന്തോറും ഊർജഉപഭോഗം വർധിക്കും. 

4. കമ്പ്യൂട്ടർ

∙എൽ.ഇ.ഡി മോണിറ്ററിന് സി. ആർ. റ്റി മോണിറ്ററിന് വേണ്ടി വരുന്നതിന്റെ 1/8 ഭാഗം വൈദ്യുതി മതിയാകും. 

∙കുറച്ചു സമയത്തേക്ക് കമ്പ്യൂട്ടർ ആവശ്യമില്ലാതെ വരികയാണെങ്കിൽ, സ്റ്റാന്റ് ബൈ അല്ലെങ്കിൽ സ്ലീപിംഗ് മോഡിൽ ഇടുകയാണ് നല്ലത്. 

∙ഒരു പ്രാവശ്യം ഓഫാക്കി വീണ്ടും ഓണാക്കുമ്പോൾ ഒരു മണിക്കൂർ സ്ലീപ്പിംഗ്, സ്റ്റാന്റ് ബൈ മോഡിൽ പ്രവർത്തിക്കുന്നതിന് ആവശ്യമായ വൈദ്യുതിയാണ് ചെലവാകുന്നത്. 

5. മിക്സി

∙നിഷ്കർഷിച്ചിരിക്കുന്നതിനേക്കാൾ കൂടുതൽ സാധനങ്ങൾ ജാറിൽ നിറയ്ക്കുന്നത് ഒഴിവാക്കുക. 

∙അരയ്ക്കാൻ ആവശ്യത്തിന് മാത്രം വെള്ളം ഉപയോഗിക്കുക. വെള്ളം കൂടിയാൽ അരയാൻ സമയം കൂടുതൽ എടുക്കും. എന്നാൽ കുറഞ്ഞാലോ മിക്സിയുടെ ലോഡ് കൂടും. 

∙ഓവർലോഡ് റിലേ ഉള്ളത് നല്ലത്. 

6. ഇൻഡക്ഷൻ കുക്കർ

∙വിറകോ, എൽ.പി.ജിയോ ഉപയോഗിക്കാൻ കഴിയാത്ത സാഹചര്യത്തിൽ മാത്രം ഉപയോഗിക്കുക.

∙ഇവ ഉപയോഗിച്ച് പാചകം ചെയ്യുമ്പോൾ മൊത്തത്തിലുള്ള വൈദ്യുതി ഉപഭോഗം കൂടുന്നതിനാൽ ഉയർന്ന വൈദ്യുതി നിരക്ക് നൽകേണ്ടി വരും. 

∙ഇൻഡക്ഷൻ കുക്കറിന്റെ പ്രതലത്തിലെ വൃത്തത്തേക്കാൾ കുറഞ്ഞ അടിവട്ടമുള്ള പാത്രങ്ങൾ ഉപയോഗിക്കാതിരിക്കുക. 

7. വാഷിങ്ങ് െമഷീൻ

∙ടോപ്പ് ലോഡിങ്ങ് മെഷീനുകളെ അപേക്ഷിച്ച് ഫ്രണ്ട് ലോഡിങ്ങ് മെഷീനുകൾ കുറച്ച് വെള്ളവും വൈദ്യുതിയും ഉപയോഗിക്കുന്നു. 

∙വെള്ളം ചൂടാക്കി ഉപയോഗിക്കുന്ന തരം വാഷിങ്ങ് മെഷീനുകൾ വൈദ്യുതി കൂടുതൽ ഉപയോഗിക്കുന്നു. 

∙നിർദേശിച്ചിരിക്കുന്ന പൂർണശേഷിയിൽ തന്നെ പ്രവർത്തിപ്പിക്കുക. 

∙എല്ലാ ദിവസവും ഉള്ള ഉപയോഗം ഒഴിവാക്കുക. 

8. വാട്ടര്‍ പമ്പ്

∙കിണറിന്റെ ആഴവും, ടാങ്കിന്റെ ഉയരവും കണക്കിലെടുത്ത് മാത്രം പമ്പ് സെറ്റുകൾ തെരഞ്ഞെടുക്കുക. 

∙പമ്പിന്റെ ഫൂട്ട് വാൽവുകൾ ആവശ്യത്തിന് വലിപ്പവും ധാരാളം സുഷിരങ്ങൾ ഉള്ളതുമായിരിക്കണം. ISI മാർക്ക് ഉള്ളത് നന്ന്. 

∙വെള്ളം കൊണ്ടു പോകുന്ന പൈപ്പുകൾക്ക് കഴിവതും വളവും തിരിവും ഒഴിവാക്കുക. 

∙ഓട്ടോമാറ്റിക് വാട്ടർലെവൽ കൺട്രോൾ ഉപയോഗിക്കുന്നത് നല്ലത്. 

∙ആഴം വളരെ കൂടിയ സ്ഥലങ്ങളിൽ സബ്മേഴ്സിബിൾ പമ്പുകൾ ഉത്തമം. 

9. വാട്ടർ ഹീറ്റർ

∙വാട്ടർ ഹീറ്ററിന്റെ താപസൂചിക എത്രയും കുറച്ച് വയ്ക്കാമോ അത്രയും നല്ലത്. 

∙താപനഷ്ടം കുറയ്ക്കുന്നതിനായി താപജലവിതരണ പൈപ്പുകൾ ഇൻസുലേറ്റ് ചെയ്യുക. 

∙കഴിവതും സോളാർ വാട്ടർ ഹീറ്ററുകൾ ഉപയോഗിക്കുക.   

10. ഇൻവെർട്ടർ

∙ഇൻവെർട്ടറുകൾ പ്രവർത്തിക്കുന്നതിന് വൈദ്യുതി ആവശ്യമാണ്. കാര്യക്ഷമത കുറഞ്ഞ ഇൻവെർട്ടറും, ബാറ്ററിയും കൂടുതൽ വൈദ്യുതി പാഴാക്കും. 

∙സോളാർ  പാനൽ സ്ഥാപിച്ച് അതുവഴി ഇൻവെർട്ടർ ചാർജ് ചെയ്യുക വഴി വൈദ്യുത ഉപയോഗം കുറയ്ക്കാം. 

∙ഓരോ ഗാർഹിക വൈദ്യുത ഉപഭോക്താവും അവരവരുെട സാമ്പത്തിക ശേഷിക്കനുസരിച്ച് ചെറിയ തോതിലെങ്കിലും ഒരു സൗരവൈദ്യുതോല്പാദന സംവിധാനം സ്ഥാപിച്ച് പരിപാലിക്കുന്നത് എല്ലാ വിധത്തിലും നല്ലൊരു മുതൽ കൂട്ടായിരിക്കും. 

English Summary- 10 Home Appliances at Home-Power Saving Tips