കൃഷിയോടു യുവ തലമുറയ്ക്ക് താല്‍പര്യമില്ലെന്നു പറയുമ്പോഴും കൃഷിയെ സ്‌നേഹിക്കുന്ന യുവതീയുവാക്കളും ഇന്ന് കേരളത്തിലുള്ളത് വിസ്മരിക്കാന്‍ കഴിയില്ല. എന്നാല്‍, കാര്‍ഷികമേഖലയിലേക്ക് ഇറങ്ങുന്ന യുവാക്കള്‍ അഭിമുഖീകരിക്കുന്ന വെല്ലുവിളികള്‍ ഏറെയാണെന്ന് പറയാതെ വയ്യ. അതായത്, ഇവര്‍ക്ക് വേറെ ജോലിയൊന്നും ലഭിച്ചില്ലേ, എന്തിന് ജീവിതം പാഴാക്കുന്നു എന്നിങ്ങനെയുള്ള കുറ്റപ്പെടുത്തലുകള്‍ ഏറെ നേരിടേണ്ടി വരുന്നുണ്ട്. അതിനെയൊക്കെ പാടേ അവഗണിച്ച് മുന്നോട്ടു പോകാന്‍ കഴിഞ്ഞെങ്കില്‍ മാത്രമേ ഇന്നത്തെ കാലത്ത് യുവാക്കള്‍ക്ക് കൃഷിയില്‍ പിടിച്ചുനില്‍ക്കാന്‍ കഴിയൂ എന്ന സ്ഥിതിയിലെത്തി. ചുരുക്കത്തില്‍ കൃഷിയും വിളവുമല്ല പലര്‍ക്കും പ്രശ്‌നം സമൂഹത്തിന്റെ കാഴ്ചപ്പാടും ചിന്താഗതികളുമാണ്.
