പെൺമനസ്സിന്റെ വന്യവും ഏകാന്തവുമായ വഴികളിലൂടെ, സമൂഹം അദൃശ്യമായ വിലക്കുകൾ കൽപിച്ചു നിയന്ത്രിച്ചു നിർത്തിയ അവളുടെ ശരീര കാമനകളിലൂടെ നിർഭയമായി ഒരുതരം വാശിയോടെ സഞ്ചരിക്കുന്ന ഭാവനയാണ് ഗ്രേസിയുടേത്. ഓരോ പെണ്ണിന്റെയും ഉള്ളിൽ സാമൂഹികാവസ്ഥകളുടെ നേർക്കു നുരയുന്ന പുച്ഛം രൂക്ഷമായ നർമ്മത്തിൽ അവതരിപ്പിക്കാനുള്ള ഗ്രേസിയുടെ ഭാഷാശക്തി അവരുടെ കഥകളുടെ വ്യതിരിക്തതയാണ്. പെണ്ണ് അനുഭവിക്കാനാഗ്രഹിക്കുന്ന ജീവിതമാണ് ഗ്രേസിയുടെ കഥകൾ.