ഓരോ അവാർഡ് കിട്ടുമ്പോഴും ബിജു മേനോനോടു ജ്യേഷ്ഠൻ ശ്രീകുമാർ പറയും: ‘‘അങ്ങനെ എനിക്കു കിട്ടേണ്ട ഒരു അവാർഡ് കൂടി നീ തട്ടിയെടുത്തു, അല്ലേ’’ എന്ന്. അതുകേട്ട് ഫോണിലൂടെ ഒന്നു പൊട്ടിച്ചിരിക്കും ബിജു. അതു മതി അദ്ദേഹത്തിന്റെ മനസ്സ് നിറയാൻ. കാൽനൂറ്റാണ്ട് പഴക്കമുള്ള ഒരു ഓർമയാണത്. മിഖായേലിന്റെ സന്തതികൾ എന്ന സീരിയലിലേക്ക് പുതുമുഖങ്ങളെ ക്ഷണിച്ചുകൊണ്ട് പരസ്യം വന്ന സമയം. അഭിനയ മോഹിയായ ശ്രീകുമാർ രണ്ടു മൂന്നു ഫോട്ടോകൾ ഉൾപ്പെടുത്തി ഒരു അപേക്ഷ അയച്ചു. ഫോട്ടോ കണ്ട ജൂഡ് അട്ടിപ്പേറ്റിക്കും പി.എഫ്. മാത്യൂസിനും ആളെ ഇഷ്ടപ്പെട്ടു. അടുത്ത ദിവസം തന്നെ നേരിട്ടു ചെല്ലാൻ അവർ ആവശ്യപ്പെടുകയും ചെയ്തു. അങ്ങനെയാണ് അനുജൻ ബിജുവിനെ സ്കൂട്ടറിന്റെ പിന്നിലിരുത്തി ശ്രീകുമാർ സ്ക്രീനിങ് ടെസ്റ്റിനു പോകുന്നത്.
