ദിനേശനായി നിവിൻ; ശോഭയായി നയൻതാര; ടീസർ
Mail This Article
നിവിന് പോളിയും നയന്താരയും പ്രധാന വേഷത്തിലെത്തുന്ന ‘ലവ് ആക്ഷന് ഡ്രാമ’യുടെ ടീസര് റിലീസ് ചെയ്തു. മോഹന്ലാലിന്റെയും പ്രണവ് മോഹന്ലാലിന്റെയും ഫെയ്സ്ബുക്ക് പേജിലൂടെയാണ് ടീസര് റിലീസ് ചെയ്തിരിക്കുന്നത്. ദിനേശനെന്നാണ് നിവിന്റെ കഥാപാത്രത്തിന്റെ പേര്. ശോഭയായി നയൻതാരയും എത്തുന്നു.
ശ്രീനിവാസന് തിരക്കഥയും സംവിധാനവും നിര്വഹിച്ച് 1989ല് പുറത്തിറങ്ങിയ ‘വടക്കുനോക്കിയന്ത്ര’ത്തിലെ കഥാപാത്രങ്ങളായിരുന്നു തളത്തില് ദിനേശനും ശോഭയും. പാര്വ്വതി ജയറാം ശോഭയായി എത്തിയ ചിത്രത്തില് സംശയരോഗമുള്ള ഭര്ത്താവ് ദിനേശനായാണ് ശ്രീനിവാസന് എത്തിയത്. വര്ഷങ്ങള്ക്ക് ശേഷം ധ്യാന് ശ്രീനിവാസന് ശോഭയെയും ദിനേശനെയും വീണ്ടും കൊണ്ടുവരികയാണ്.
അജു വര്ഗീസും വിശാഖ് സുബ്രഹ്മണ്യവും ചേര്ന്ന് നിര്മിക്കുന്ന ചിത്രത്തില് ശ്രീനിവാസന്, മല്ലിക സുകുമാരന്, ‘മലര്വാടി ആര്ട്സ് ക്ലബ്ബി’ലെ താരങ്ങളായ അജു വര്ഗീസ്, ഭഗത് മാനുവല്, ഹരികൃഷ്ണന്, ദീപക് പറമ്പോലും പ്രധാന വേഷങ്ങളിലെത്തുന്നു. ഷാൻ റഹ്മാൻ സംഗീതം. ഛായാഗ്രഹണം ജോമോൻ ടി. ജോൺ, റോബി വർഗീസ്. ചിത്രം ഓണം റിലീസായി തിയറ്ററുകളിലെത്തും.