ക്യാമറാമാൻ കിണറ്റിലേയ്ക്ക്; ജല്ലിക്കെട്ട് മേക്കിങ് വിഡിയോ ടീസർ

കേട്ടതൊക്കെ ശരിയാണെന്ന് ടീസറും ട്രെയിലറും ഇറങ്ങിയതോടെ മലയാളി ശരിവച്ചതാണ്. കാരണം അത്രത്തോളം ആഴത്തിൽ സിനിമയെ പുതിയ തലത്തിലേക്ക് എത്തിക്കുന്നു ലിജോ ജോസ് പെല്ലിശേരിയുടെ ജല്ലിക്കട്ട്. ഇതിന് പിന്നാലെ സിനിമയുടെ മേക്കിങ് വിഡിയോ ടീസർ കൂടി പങ്കുവച്ചിരിക്കുകയാണ് അണിയറപ്രവർത്തകർ. ഒരു മിനിറ്റ് ദൈർഘ്യമുള്ള വിഡിയോയിൽ നിന്നു തന്നെ വ്യക്തമാണ് ജല്ലിക്കെട്ട് എന്ന സിനിമയ്ക്ക് വേണ്ടിയുള്ള അധ്വാനം. 

ഗ്രാമത്തിൽ കയറുപൊട്ടിച്ചോടുന്ന പോത്തിനെ മെരുക്കാൻ ശ്രമിക്കുന്ന ഒരുകൂട്ടം ആളുകളുടെ കഥയാണ് ചിത്രം പറയുന്നത്.  ആന്റണി വര്‍ഗീസിനൊപ്പം ചെമ്പന്‍ വിനോദ് ജോസ്, സാബുമോന്‍ അതുടങ്ങിയവരും പ്രധാന വേഷങ്ങളിലെത്തുന്നുണ്ട്. തരംഗം ഫെയിം ശാന്തിയാണ് നായിക. എസ്. ഹരീഷ്, ആര്‍. ജയകുമാര്‍ എന്നിവര്‍ ചേര്‍ന്ന് തിരക്കഥ ഒരുക്കിയിരിക്കുന്നത്.  അങ്കമാലി ഡയറീസിന് വേണ്ടി ക്യാമറ ചലിപ്പിച്ച ഗിരീഷ് ഗംഗാധരന്‍ തന്നെയാണ് ജെല്ലിക്കട്ടിനും ഛായാഗ്രഹണം നിര്‍വ്വഹിച്ചിരിക്കുന്നത്. പ്രശാന്ത് പിളള സിനിമയ്ക്ക് വേണ്ടി സംഗീതമൊരുക്കിയിരിക്കുന്നു. ഹരീഷ് എഴുതിയ മാവോയിസ്റ്റ് എന്ന ചെറുകഥയെ ആസ്പദമാക്കിയുള്ളതാണ് ചിത്രം.