ആ വേദന സ്ക്രീനിൽ കണ്ടു; വികാരനിർഭരനായി എൽദോ
Mail This Article
സമൂഹമാധ്യമങ്ങളില്‍ വേട്ടയാടപ്പെട്ട അങ്കമാലിക്കാരന്‍ എല്‍ദോയുടെ കഥ സിനിമയായപ്പോള്‍ നിറഞ്ഞ കയ്യടിയോടെ സ്വീകരിച്ച് പ്രേക്ഷകര്‍. കൊച്ചി മെട്രോയില്‍ മദ്യപിച്ചുകിടന്നുവെന്ന പേരില്‍ രണ്ടുവര്‍ഷംമുന്‍പ് പ്രചരിച്ച എല്‍ദോയുടെ ചിത്രത്തിന് പിന്നിലെ സത്യാവസ്ഥ പുറത്തുകൊണ്ടുവന്നത് മനോരമ ന്യൂസാണ്. വിക‍ൃതി എന്ന പേരിലിറങ്ങിയ സിനിമ ഏറെ വൈകാരികതയോടെയാണ് എല്‍ദോയും കുടുംബവും കണ്ടുതീര്‍ത്തത്.
ജീവിതഗന്ധിയായ ഒരു സിനിമ കണ്ടുതീര്‍ക്കുകയായിരുന്നു കേള്‍വിയും സംസാരശേഷിയുമില്ലാത്ത എല്‍ദോ. എല്‍ദോയെ ഒാര്‍ക്കുന്നില്ലെ ?. രണ്ടുവര്‍ഷം മുന്‍പ് നിങ്ങളില്‍ത്തന്നെയുള്ള പലരും അറിഞ്ഞും അറിയാതെയും പങ്കുവച്ച എല്‍ദോയുടെ ആ ചിത്രം ഒാര്‍ക്കുന്നില്ലെ ?. കൊച്ചി മെട്രോയിലെ പാമ്പെന്ന പേരില്‍ പ്രചരിച്ച ആ ചിത്രത്തിന് പിന്നിലെ സത്യം വിളിച്ചുപറഞ്ഞത് മനോരമ ന്യൂസാണ്.
ആ അനുഭവം സിനിമയില്‍ കണ്ടുതീര്‍ത്ത എല്‍ദോ പങ്കുവച്ചതൊക്കെയും വേദനയാണ്. എല്‍ദോയുടെ ആ വേദന സിനിമയിലെടുത്തത് നവാഗത സംവിധായകന്‍ എം.സി.ജോസഫാണ്. സൗബിന്‍ സാഹിര്‍ നായകനായ ചിത്രത്തില്‍ മഴവില്‍ മനോരമയിലെ നായിക നായകനില്‍ വിജയിയായ വിന്‍സിയാണ് നായിക.
