പൂവൻകോഴികൾക്കു നടുവിൽ മഞ്ജു വാരിയർ; ‘പ്രതി പൂവൻ കോഴി’ ഫസ്റ്റ്ലുക്ക്
Mail This Article
ഹൗ ഓൾഡ് ആർ യു എന്ന ചിത്രത്തിനു ശേഷം മഞ്ജു വാരിയറും റോഷൻ ആൻഡ്രൂസും ഒന്നിക്കുന്നു. ഉണ്ണി ആറിന്റെ ഏറെ ചർച്ചയായ നോവൽ, പ്രതി പൂവൻ കോഴിയുടെ ചലച്ചിത്രാവിഷ്കാരവുമായാണ് സൂപ്പർഹിറ്റ് ടീം വീണ്ടും ഒന്നിക്കുന്നത്. സിനിമയുടെ ഫസ്റ്റ്ലുക്ക് പോസ്റ്റര് റിലീസ് ചെയ്തു. മോഹൻലാൽ ആണ് പോസ്റ്റർ ഔദ്യോഗികമായി പുറത്തിറക്കിയത്.
തീക്ഷണതയേറിയ ജ്വലിക്കുന്ന കണ്ണുകളുമായി നിൽക്കുന്ന മഞ്ജുവിനെ പോസ്റ്ററിൽ കാണാം. ചിത്രത്തിൽ മാധുരി എന്ന കഥാപാത്രമായാണ് മഞ്ജു എത്തുക. വസ്ത്രശാലയിലെ സെയിൽസ് ഗേൾ ആണ് മാധുരി. ഇവരുടെ ജീവിതത്തിലുണ്ടാകുന്ന അപ്രതീക്ഷിത സംഭവങ്ങളിലൂടെയാണ് ചിത്രം മുന്നോട്ടുപോകുന്നത്. സംവിധായകനായ റോഷൻ ആൻഡ്രൂസ് തന്നെ ചിത്രത്തിൽ വില്ലനായി എത്തുന്നു എന്നതാണ് മറ്റൊരു പ്രത്യേകത.
ശ്രീഗോകുലം മൂവീസ്സിന്റെ ബാനറില് ഗോകുലം ഗോപാലന് നിർമിക്കുന്ന ഈ ചിത്രത്തിന്റെ തിരക്കഥയും സംഭാഷണവും ഉണ്ണി ആര് തന്നെയാണ്. അനുശ്രീ, സൈജു കുറുപ്പ്, അലന്സിയര്, എസ് പി ശ്രീകുമാര്, ഗ്രേസ് ആന്റണി തുടങ്ങിവരും അഭിനയിക്കുന്നു. ജി ബാലമുരുകന് ഛായാഗ്രഹണം നിര്വ്വഹിക്കുന്നു. സംഗീതം: ഗോപി സുന്ദര്.