ടീസറില്ല; സര്പ്രൈസുമായി ദുൽഖറും അനൂപും
Mail This Article
ടീസറില്ലാ ചിത്രത്തിലെ പാട്ടു നാളെ പുറത്തിറങ്ങുന്നു. സിനിമയുടെ ടീസർ റിലീസ് ചെയ്യുക എന്നതു വലിയ വാർത്തയാകുന്ന കാലമാണിത്. ആരാണു ടീസർ റിലീസ് ചെയ്യുക എന്നു പലരും ആഴ്ചകൾക്കു മുൻപെ പ്രഖ്യാപിക്കും. എന്നാൽ ഇതിനിടയിൽ തികച്ചും അപ്രതീക്ഷിതമായി ദുൽഖർ നിർമിക്കുന്ന സിനിമയായ വരനെ ആവശ്യമുണ്ട് ടീസറില്ലാതെ പാട്ടു നേരിട്ടു കാണികളിലെത്തുകയാണ് നാളെയാണു പാട്ട് പുറത്തു വരുന്നത്.
അനൂപ് സത്യൻ സംവിധാനം ചെയ്യുന്ന ‘വരനെ ആവശ്യമുണ്ട്’ എന്ന സിനിമയിൽ വൻ താരനിരയുണ്ട്. ദുൽഖർ സൽമാൻ, സുരേഷ് ഗോപി, ശോഭന,കല്യാണി പ്രിയദർശൻ തുടങ്ങി പലരും. സിനിമ നിർമിക്കുന്നതു ദുൽഖർതന്നെയാണ്.
ദുൽഖറിന്റെ വെഫെയറർ ഫിലിംസിന്റെ ആദ്യ സിനിമയാണിത്. അനൂപ് സത്യൻ സംവിധാനം ചെയ്യുന്ന ആദ്യ സിനിമ, കല്യാണി പ്രിയദർശന്റെ ആദ്യ മലയാള സിനിമ. അൽഫോൻസ് ജോസഫാണ് സംഗീതം. സിനിമയിലെ ദുൽഖറിന്റെ ലുക്ക് ഇപ്പോൾ പുറത്തുവന്നിട്ടുണ്ട്. ചിത്രങ്ങൾ മനോരമ ഓൺലൈനിലൂടെയാണ് പുറത്തിറക്കിയത്.
അതി മനോഹരമായ കുടുംബ ദൃശ്യങ്ങളാണു ആദ്യ പാട്ടിലുള്ളത്. സിനിമയുടെ മൂഡു തന്നെ ഈ പാട്ടിലറിയാം. സന്തോഷ് വർമയാണ് ഇതിലെ മലയാളം ഭാഗമെഴുതിയത്. കെ.എസ്.ചിത്രയും കാർത്തിക്കും പാടിയിരിക്കുന്നു.
ആദ്യ പാട്ടിൽ ദുൽഖറും കല്യാണിയും ദുൽഖറും ശോഭനയും സുരേഷ്ഗോപിയുമെല്ലാമുണ്ടുതാനും. ആദ്യം ടീസറില്ലാതെ പാട്ടു നേരിട്ടു എത്തുമെങ്കിലും വരും ദിവസങ്ങളിൽ ടീസറുകൾ എത്തും.