പൃഥ്വിയും ബിജു മേനോനും നേർക്കുനേർ; അയ്യപ്പനും കോശിയും ട്രെയിലർ
Mail This Article
അനാര്ക്കലിക്ക് ശേഷം സച്ചി രചനയും സംവിധാനവും നിര്വഹിക്കുന്ന അയ്യപ്പനും കോശിയും ട്രെയിലർ എത്തി. പൃഥ്വിരാജും ബിജു മേനോനുമാണ് ചിത്രത്തിലെ പ്രധാനതാരങ്ങൾ.
അട്ടപ്പാടിയിലെ സബ് ഇന്സ്പെക്ടര് അയ്യപ്പൻ നായരായി ബിജു മേനോനും, പട്ടാളത്തില് 16 വര്ഷത്തെ സര്വീസിന് ശേഷം നാട്ടിലെത്തിയ ഹവീല്ദാര് കോശി കുര്യനായി പൃഥ്വിരാജും എത്തുന്നു. നാല് വര്ഷത്തിന് ശേഷമാണ് സച്ചി സ്വന്തം സംവിധാനത്തില് രണ്ടാമത്തെ സിനിമയുമായി വരുന്നത്. രഞ്ജിത്ത് ആണ് പൃഥ്വിയുടെ അച്ഛന്റെ വേഷത്തിൽ എത്തുന്നത്. അന്ന രേഷ്മ രാജൻ, സാബുമോൻ എന്നിവരാണ് മറ്റ് താരങ്ങൾ.
സംവിധായകന് രഞ്ജിത്തിന്റെ നേതൃത്വത്തിലുള്ള നിര്മാണ വിതരണ കമ്പനിയായ ഗോള്ഡ് കോയിന് മോഷന് പിക്ചേഴ്സാണ് നിർമാണം. ജേക്സ് ബിജോയ് സംഗീതവും പശ്ചാത്തല സംഗീതവും. സുദീപ് ഇളമണ് ആണ് ക്യാമറ. പതിനെട്ടാം പടി, ഫൈനല്സ് എന്നീ സിനിമകള്ക്ക് ശേഷം സുദീപ് ക്യാമറ ചെയ്യുന്ന ചിത്രവുമാണ് അയ്യപ്പനും കോശിയും. പാലക്കാടും അട്ടപ്പാടിയിലുമായാണ് പ്രധാന ഭാഗങ്ങള് ചിത്രീകരിക്കുന്നത്. ചിത്രം ഫെബ്രുവരി 7ന് റിലീസിനെത്തും.