ഗ്രേറ്റ് ഇന്ത്യൻ കിച്ചൻ തമിഴ് റീമേക്ക്; ചിത്രീകരണം തുടങ്ങി
Mail This Article
ഒടിടി റിലീസ് ആയി എത്തി പ്രേക്ഷക ശ്രദ്ധനേടിയ ഗ്രേറ്റ് ഇന്ത്യൻ കിച്ചൻ തമിഴ് റീമേക്ക് ചിത്രീകരണം തുടങ്ങി. നിമിഷ അവതരിപ്പിച്ച കഥാപാത്രം തമിഴില് ചെയ്യുന്നത് ഐശ്വര്യ രാജേഷ് ആണ്. സംവിധായകൻ ആർ. കണ്ണനാണ് തമിഴിലും തെലുങ്കിലും സിനിമയുടെ റീമേക്ക് അവകാശം വാങ്ങിയിരിക്കുന്നത്. കണ്ണൻ തന്നെയാണ് റീമേക്ക് സംവിധാനം ചെയ്യുന്നതും. ജയംകൊണ്ടേന്, കണ്ടേന് കാതലൈ, സേട്ടൈ തുടങ്ങിയ സിനിമകളിലൂടെ ശ്രദ്ധേയനാണ് കണ്ണൻ.
തമിഴിൽ കാരക്കുടിയാണ് സിനിമയുടെ പ്രധാന ലൊക്കേഷനായി നിശ്ചയിച്ചിരിക്കുന്നതെന്നാണ് തമിഴ് മാധ്യമങ്ങള് റിപ്പോര്ട്ട് ചെയ്തിട്ടുള്ളത്. പി.ജി മുത്തയ്യയാണ് ഛായാഗ്രഹണം. കലാ സംവിധാനം രാജ്കുമാര്, തിരക്കഥ, സംഭാഷണം പട്ടുകോട്ടൈ പ്രഭാകര്.
മലയാളത്തിൽ ജിയോ ബേബിയായായിരുന്നു സിനിമയുടെ കഥയും തിരക്കഥയും സംഭാഷണവും സംവിധാനവും. നിമിഷ സജയൻ–സുരാജ് വെഞ്ഞാറമ്മൂട് ജോഡികളുടെ അഭിനയപ്രകടനം സിനിമയുടെ പ്രധാന ആകർഷണമായിരുന്നു. ഡിജോ അഗസ്റ്റിന്, ജോമോന് ജേക്കബ്, വിഷ്ണു രാജന്, സജിന് എസ് രാജ് എന്നിവരായിരുന്നു നിർമാണം.