കനേഡിയൻ കാറ്റിലും സിബിഐ 5ന്റെ സ്നേഹം: കെ. മധു പറയുന്നു

കാനഡയിൽ നിന്നും മമ്മൂട്ടി ആരാധകരുടെ സ്നേഹം ഏറ്റുവാങ്ങി സംവിധായകൻ കെ. മധു. മമ്മൂട്ടി ഫാൻസ് ആൻഡ് വെൽഫെയർ അസ്സോസിയേഷൻ ഇന്റർനാഷ്നൽ കാനഡയുടെ ആഭിമുഖ്യത്തിൽ നടന്ന പരിപാടിയിൽ സംവിധായകന് ഊഷ്മളമായ വരവേൽപ്പാണ് ലഭിച്ചത്.

‘‘കനേഡിയൻ കാറ്റിലും സിബിഐ 5 ചിത്രത്തിനോടുള്ള സ്നേഹസുഗന്ധം ഞാൻ അനുഭവിച്ചു. കാനഡയിലെ യാത്രകളിൽ ഞങ്ങളുടെ സിബിഐ സീക്വൻസ് ചിത്രങ്ങളെ സ്നേഹിക്കുന്ന ഒട്ടേറെപ്പേരെ കണ്ടു. അവർ സ്നേഹബഹുമാനത്തോടെ എന്നെ അവരവരുടെ സെൽഫിക്കുള്ളിലാക്കി. സിനിമയെകുറിച്ച് വാതോരാതെ സംസാരിച്ചു. അതിൽ നിന്ന് ഈ ജനതയെ അത്രകണ്ട് ചിത്രം രസിപ്പിച്ചിട്ടുണ്ടെന്ന ബോധ്യത്താൽ എന്റെ മനസ്സ് നിറഞ്ഞു. 

ഒരു സുന്ദര സായാഹ്നത്തിൽ Mammootty Fans & Welfare Association International Canadaയുടെ ആഭിമുഖ്യത്തിൽ സ്നേഹാദരം സ്വീകരിച്ചു. അവരുടെ ചോദ്യങ്ങൾക്കുള്ള എന്റെ മറുപടിയിൽ  മമ്മൂട്ടിയും എസ്.എൻ. സ്വാമിയും നിറഞ്ഞു നിന്നപ്പോൾ ആ മഹനീയ വ്യക്തിത്വങ്ങൾ ഇവിടെ ഉള്ളതായി തോന്നി പോകുന്നു എന്ന് അവർ പറഞ്ഞപ്പോൾ എനിക്കും അതിൽ കൗതുകമുണ്ടായി.ഒരു കലാകാരനെന്ന നിലയിൽ മറുനാട്ടിൽ നേടുന്ന ഓരോ അംഗീകാരവും മഹനീയമാണ്. ആ സന്തോഷം ഒരു സംവിധായകനെന്ന നിലയിൽ എന്നിലേക്കെത്തിച്ചേരാൻ കാരണഭൂതരായ ഏവർക്കും ഹൃദയപൂർവം നന്ദി.’’–കെ. മധു പറഞ്ഞു.