രണ്ടാമൂഴം സംവിധാനം ചെയ്യുമോ എന്ന ചോദ്യത്തിനു രസകരമായ മറുപടിയുമായി സംവിധായകൻ പ്രിയദർശൻ. ‘കൊറോണ പേപ്പേഴ്സ്’ എന്ന ചിത്രത്തിന്റെ പ്രചാരണപരിപാടിയുടെ ഭാഗമായി മാധ്യമങ്ങളെ കണ്ടപ്പോൾ പ്രതികരിക്കുകയായിരുന്നു അദ്ദേഹം. എംടിയുടെ തിരക്കഥയിൽ രണ്ടാമൂഴം സംവിധാനം ചെയ്യുമെന്നു കേട്ടിരുന്നല്ലോ എന്ന മാധ്യമപ്രവർത്തകന്റെ ചോദ്യത്തിന് കുഞ്ഞാലി മരക്കാർ ചെയ്തതോടെ മതിയായി എന്നും ഇനി ഒരു ഊഴവുമില്ല എന്ന രസകരമായ ഉത്തരമാണ് പ്രിയദർശൻ നൽകിയത്. സിനിമകളുടെ പരാജയത്തിനു കാരണം മോശം തിരക്കഥകളാണെന്നും അദ്ദേഹം പറഞ്ഞു.

‘സിനിമകളുടെ പരാജയത്തിനു കാരണം സിനിമ കാണാൻ വരുന്ന പ്രേക്ഷകനെ പിടിച്ചിരുത്താൻ കഴിയാത്തതാണ്. വളരെ മോശമായ ഒരു തിരക്കഥ എത്ര നന്നായിട്ട് എടുത്താലും ഓടില്ല. നല്ല തിരക്കഥയാണെങ്കിൽ എത്ര മോശമായിട്ട് എടുത്താലും വിജയിക്കും. കാരണം ഉള്ളടക്കമാണ് പ്രധാനം. തിരക്കഥ എഴുതുകയാണ് സിനിമയിൽ ഏറ്റവും പ്രയാസമേറിയ ഘട്ടം. അതിലും ബുദ്ധിമുട്ടുള്ളതായി സിനിമയിൽ ഒന്നുമില്ല എന്നു ഞാൻ വിശ്വസിക്കുന്നു.' പ്രിയദർശൻ പറഞ്ഞു 

ഒരു സിനിമ എടുത്തു കഴിയുമ്പോള്‍ തോന്നും, ഇപ്പോൾ ടെക്നിക് പിടികിട്ടിയെന്ന്. പക്ഷേ ആ സിനിമ പരാജയപ്പെടാറാകുമ്പോഴായിരിക്കും ടെക്നിക് പിടികിട്ടിയിട്ടില്ലെന്നു മനസ്സിലാകുക. അത് കൊറിയൻ സിനിമയോ ബ്രസീലിയനോ ആയാലും സിനിമ ഇറങ്ങുമ്പോൾ പ്രേക്ഷകനിൽ താൽപര്യം ജനിപ്പിക്കാൻ കഴിഞ്ഞില്ലെങ്കിൽ അതൊരു തോൽവിയായി മാറും. പ്രേക്ഷകർ എന്താണ് കാണാൻ ആഗ്രഹിക്കുന്നതെന്നു മനസ്സിലാക്കുന്ന സംവിധായകൻ വിജയിക്കും. വിജയവും പരാജയവും സിനിമയുടെ ഭാഗമാണ്. അത്ര തന്നെ, പ്രിയദർശൻ കൂട്ടിച്ചേർത്തു.