വമ്പൻ കാൻവാസിൽ ‘ബ്രഹ്മാസ്ത്ര’ രണ്ടും മൂന്നും ഭാഗങ്ങൾ: റിലീസ് 2026 ൽ
Mail This Article
ആലിയ ഭട്ട്, രണ്‍ബീർ കപൂർ എന്നിവരെ പ്രധാന കഥാപാത്രങ്ങളാക്കി അയാൻ മുഖർജി ഒരുക്കിയ ബ്രഹ്മാണ്ഡ ചിത്രം ‘ബ്രഹ്മാസ്ത്ര’യ്ക്ക് തുടർഭാഗങ്ങൾ വരുന്നു. ആദ്യ ഭാഗത്തേക്കാള്‍ വലിയ കാന്‍വാസിലാവും തുടര്‍ ഭാഗങ്ങള്‍ വരികയെന്നും രണ്ട് ഭാഗങ്ങളുടെയും ചിത്രീകരണം ഒരുമിച്ചാകും നടക്കുകയെന്നും അയന്‍ മുഖര്‍ജി അറിയിച്ചു.
ആദ്യ ഭാഗത്തിന് പ്രേക്ഷകര്‍ നല്‍കിയ പിന്തുണയില്‍ നിന്നാണ് 2, 3 ഭാഗങ്ങള്‍ കൂടുതല്‍ പകിട്ടോടെ എത്തിക്കാനുള്ള ഊര്‍ജം ലഭിച്ചതെന്ന് പറയുന്ന അയന്‍ മുഖര്‍ജി ഈ ഭാഗങ്ങളുടെ റിലീസ് എപ്പോഴെന്നും പ്രഖ്യാപിച്ചിട്ടുണ്ട്. ബ്രഹ്മാസ്ത്ര ട്രിലജിയുടെ ആദ്യ ഭാഗത്തിന്‍റെ പേര് ശിവ എന്നായിരുന്നെങ്കില്‍ രണ്ടാം ഭാഗത്തിന്‍റെ പേര് ദേവ് എന്നാണ്. ഈ ഭാഗം 2026 ഡിസംബറിലും മൂന്നാം ഭാഗം 2027 ഡിസംബറിലും തിയറ്ററുകളില്‍ എത്തും.
ആദ്യ ഭാഗത്തിൽ നിന്നു ലഭിച്ച പ്രതികരണങ്ങളിൽ നിന്നും അടുത്ത രണ്ട് ഭാഗങ്ങളുടെ തിരക്കഥയിലും കാര്യമായ മാറ്റം വരുത്തുന്നുണ്ടെന്നും അയാൻ പറയുന്നു. അമിതാഭ് ബച്ചൻ, നാഗാർജുന, ഷാറുഖ് ഖാൻ, മൗനി റോയ് തുടങ്ങി വമ്പൻ താരനിരയായിരുന്നു ആദ്യ ഭാഗത്തിൽ അണിനിരന്നത്. രണ്ടാം ഭാഗത്തിൽ ദീപിക പദുക്കോൺ, രൺവീർ സിങ് തുടങ്ങിയവരും പ്രത്യക്ഷപ്പെടുമെന്ന് റിപ്പോർട്ട് ഉണ്ട്.
