കണക്കുതീർക്കാൻ ബൻവാർ സിങ്; ‘പുഷ്പ 2’വിലെ ഫഹദിന്റെ ലുക്ക് പുറത്ത്
Mail This Article
അല്ലു അർജുൻ നായകനായെത്തുന്ന പുഷ്പ 2വില് നിന്നുള്ള ഫഹദ് ഫാസിലിന്റെ ലൊക്കേഷൻ ചിത്രമാണ് സമൂഹമാധ്യമങ്ങളിൽ വൈറൽ. ബന്വാര് സിങ് ഷെഖാവത്ത് ഐപിഎസ് എന്ന പൊലീസ് ഉദ്യോഗസ്ഥനായാണ് ഫഹദ് ചിത്രത്തിലെത്തുന്നത്.
പുഷ്പ 2വിന്റെ ഫസ്റ്റ് ലുക്കും ടീസറും പുറത്തുവന്നതോടെ ലോകമെമ്പാടുമുള്ള പ്രേക്ഷകര് ബന്വര് സിങ് ഷെഖാവത് എവിടെ എന്ന ആകാംഷയിലായിരുന്നു. പുഷ്പ ഒന്നാം ഭാഗത്തില് ഫഹദ് ഫാസില് അവതരിപ്പിച്ച വില്ലന് കഥാപാത്രം രണ്ടാം ഭാഗത്തിലും ഉണ്ടാവുമോ എന്ന പ്രേക്ഷകരുടെ ആകാംക്ഷയ്ക്ക് വിരാമമിട്ടുകൊണ്ടാണ് ഇപ്പോള് ഈ ചിത്രം പുറത്തുവിട്ടത്. ഒന്നാം ഭാഗത്തില് ഏറെ പ്രശംസ നേടിയ ഫഹദിന്റെ പൊലീസ് റോള് രണ്ടാം ഭാഗത്തിലും തീ പാറിക്കുമെന്നാണ് റിപ്പോർട്ട്.
മൈത്രി മൂവി മേക്കേഴ്സിന്റെ ബാനറില് സുകുമാർ സംവിധാനം ചെയ്യുന്ന പുഷ്പയുടെ രണ്ടാം ഭാഗത്തിൽ അല്ലുവിന്റെയും ഫഹദിന്റെയും തകര്പ്പൻ പ്രകടനം തന്നെയാകും പ്രധാന ഹൈലൈറ്റ്. രശ്മിക മന്ദാന നായികയാവുന്ന ചിത്രം മൈത്രി മൂവി മേക്കേഴ്സിന്റെ ബാനറില് നവീൻ യേർനേനിയും വൈ. രവിശങ്കറും ചേർന്നാണ് നിർമിക്കുന്നത്.
അല്ലുവിനെയും രശ്മികയെയും ഫഹദിനെയും കൂടാതെ ധനുഞ്ജയ്, റാവു രമേഷ്, സുനിൽ, അനസൂയ ഭരദ്വാജ്, അജയ് ഘോഷ് തുടങ്ങിയവരും അണിനിരക്കുന്ന ചിത്രത്തിന്റെ സംഗീതം ദേവി ശ്രീ പ്രസാദ് (ഡി.എസ്.പി), ഛായാഗ്രഹണം മിറോസ്ലാവ് കുബ ബ്രോസെക്ക്, എഡിറ്റിങ് കാർത്തിക ശ്രീനിവാസ്, പിആര്ഒ ആതിരാ ദില്ജിത്ത്.